2373/2023-2024

2023 Khuangchawi thla ni 19: Mizoram Legislative Assembly Inthlanpui, 2023 lo awm tura Kolasib District huam chhunga assembly constituency pathum, 4-Tuirial (ST), 5-Kolasib (ST) leh 6-Serlui (ST) biala chuh tum mi paruk (bial tinah mi pahnih ṭheuh) chuan vawiin khan Returning Officer (RO)-te hnenah inthlan chuh turin nomination an theh lut a. Heti hian Kolasib District chhunga assembly bial pathuma inthlan chuh tura hming pe lut mi pariat an awm ta.

MLA Inthlanpuia chuh tumte tana hming pek luhna hun hawn mekah vawiin khan Tuirial biala chuh tum, Mizo National Front (MNF) official candidate, Bialtu MLA ni lai Pu K. Laldawngliana leh Zoram People's Movement (ZPM) official candidate Pu Laltlanmawia te chuan Tuirial AC Returning Officer Pi Melody Ngurthantluangi hnenah nomination paper an theh lut a. Tuirial biala chuh tura hming pe lut pahnih an awm ve ta tihna a ni.

Kolasib biala chuh tum, Indian National Congress (INC) official candidate Pu S. Lalrinawma leh ZPM official candidate Pu Lalfamkima te chuan vawiin vek khan Kolasib AC Returning Officer Pu John LT Sanga hnenah nomination paper an theh lut ve bawk a. Kolasib bialah hian niminah MNF ticket-a chuh tur, Bialtu MLA ni lai Pu K. Lalrinliana chuan hming lo pe lut tawhin, heti hian Kolasib biala chuh tura hming pe lut pathum an awm tawh tihna a ni.

Serlui biala chuh tum, INC official candidate Pu Lalhmachhuana leh ZPM official candidate Pu C. Lalthanfela te chuan vawiin vek khan Serlui AC Returning Officer Pu Lalmuan Puia hnenah nomination paper an theh lut ve leh bawk a. Serlui bialah hian niminah MNF ticket-a chuh tur, Bialtu MLA ni lai Pu Lalrinsanga Ralte chuan hming lo pe lut tawhin, heti hian Serlui biala chuh tura hming pe lut pathum an awm tawh tihna a ni.

Inthlan chuh tumte tana hming pek luh theih hun hi bial tinah October ni 13, 2023 aṭang khan hawn niin, October ni 20, 2023 thleng khian hun hawn a ni dawn a. Public holiday tih lohvah chuan zing dar 11 leh tlai dar 3 inkar chhungin assembly bial returning officer emaw, assistant returning officer emawte hnenah hming hi pek luh theih a ni. Hming pek luhte hi October ni 21, 2023 (Inrinni) chawhma dar 11:00-ah endik a ni ang.