3402/2023-2024

2024 Pawlkut thla ni 19: Vawiin khan Saipum Broom Growers' Cooperative Society (SABCOS) te'n FOCUS Mizoram hma laknaa Market Access Facillity (MAF) hnuaia sum ₹ nuai 25 senga Saipum Zero Point-a hmunphiah sawngbawlna atana Broom Processing Unit (Warehouse) an sak chu FOCUS Mizoram State Project Director Pi Lalengzami Haolai chuan a hawng.

Saipum Broom Processing Unit hawnna hun hi LRS&WC Joint Director Pi Rosy Lalmuansangi Hmar chuan kaihruaiin, SABCOS member Pu R. Lalchamliana'n hunserh a hmang a. SABCOS Chairman Pu CS Lalthlamuanga'n report leh lawm thu sawiin, FOCUS Kolasib District Project Manager Pu Lalremruata Sailo leh Kolasib District Cooperative Officer Pu Lalthlamuana te pawhin thu an sawi.

SABCOS Chairman report-a tar lan a nih danin, Saipum khuaah hian in 580 vel awmin, 80% vel chu hmunphiah huan nei an ni a. Kum tin hmunphiah a hringin quintal 10,000 aṭanga 13,000 vel thar ṭhinin, hmunphiah hralhna aṭang hian Saipum khua hian ₹ nuai 300 aṭanga ₹ nuai 400 vel an la lut ṭhin a ni.

Saipum khuaa hmunphiah chingtute'n hmunphiah an thar chhuah hi anmahniin a man (rate) bithliah lovin, a leitute'n a rate an bithliahsak ṭhin a. Tunah chuan Warehouse-ah hian an hmunphiah thar chhuahte dah khawmin, Society kal tlangin an hralh ṭhin tawh dawn a ni.

Saipum Broom Processing Unit hian Warehouse bakah, khawl chi hrang hrang - hmunphiah tihrona tur tunnel dryer leh exhaust fan leh ceiling fan te a keng tel a. Warehouse hi quintal 150 vel leng tura buatsaih a ni.

Saipum Broom Processing Unit sakna project cost ₹ nuai 25 aṭang hian SABCOS lamin 10% thawh vein, a pawisa fai chuan ₹ nuai 2.5 a ni a. A bak 90% (₹ nuai 22.5) chu FOCUS Mizoramin a tum thung a. Warehouse sakna leh khawl dahna bakah hian a hmunhma laih zawlna leh a panna kawng sialna te pawh project hian a keng tel a ni.