3401/2023-2024

Aizawl 19th January, 2024 : Pu Lalramsanga Sailo, Secretary, Labour, Employment, Skill Development & Entrepreneurship Office Chamber-ah vawiin khan Air Force sipai, Agnipath Scheme Agniveervayu lakna atana Registration kaihhnawih chungchang sawihoin 11 Airmen Selection Centre, IAF a Wing Commander BS Rathore hovin thutkhawm a ni.

Wing Commander BS Rathore chuan Air Force sipai lak dan chungchang sawizauin Mizo thalai a tam thei ang berin he Scheme hi hmelhriat se a duh thu leh Scheme chungchang Awareness pek kawngah State Sorkar chu thawhpui a duh thu a sawi a. Meeting-ah hian Awareness pek dan kawng hrang hrangte sawiho nghal anih bakah Mizoram atanga Candidate Application tam dan azirin Exam Centre Aizawl-a buatsaih dan zawn nise tih a ni bawk.

Indian Air Force-in Agnipath Scheme hnuaia Agniveervayu lakna tur a tihchhuah angin Online Registration hi Ni 17 January atanga Ni 6 February 2024 thleng hawn a ni a. Thalai mipa leh hmeichhia, Ni 2 January 2004 leh Ni 2 July, 2007 inkara piang, Pawl 12 pass tan he hna hi dil theih a ni. Hriatchian duh nei chuan agnipathvayu.cdac.in bakah LESDE.mizoram.gov.in leh Empex.mizoram.gov.in -ah te ngaihven theih a ni.

Agniveervayu-a tling te hian Kum 4 chhung thlatin Rs.30000 - Rs.40000/- an hlawh ang a. Kum 4 an thawh zawhah Nuai 11 a hlawma pek an nih anih dawn bakah Nuai 48 Life Insurance cover premium free pek vek an ni dawn a. Kum 4 an thawh zawh hnuah hian 25% te chu thawk chhunzawm tura lak an ni ang a, a dang 75% te chu Central leh State Sorkar-ah leh Corporation-ah te an thawh theih nan hmalakpui an ni bawk dawn a ni.

Vawiin thutkhawmah hian LESDE, Higher & Technical Education, Mizoram Youth Commission bakah ICT Officials te an tel a ni.