No.7466/2020-2021

Vawiin chawhma khan Parish Hall, Venglai, Kolasibah ram kang venna kawngah hmalakna pawimawh tak,’Fire Prevention Week 2021’ chu ‘Kangmei tichhuak lo turin mi tin I fimkhur ang u” tih thupui hmangin a hawnna hun hman a ni a, Dr.H.Lalthlangliana, Deputy Commissioner chu Khuallian niin Pu.C.Liankunga, President, Sub-Headquarter YMA, Kolasib chuan hun a kaihruai a ni.

Dr.H.Lalthlangliana chuan kangmei chhuak tam zawk chu fimkhur lohna avang a chhuak a nih thu sawiin,” Fimkhurna avang hian ram kang tur tam zawk kan veng thei a ni,” a ti a, In kang thleng thin ah pawh hian a chhan bul ber chu fimkhur loh vang a nih thin thu a sawi bawk a ni. Kangmei ven hna chu Forest department emaw Fire department thawh tur bik ni lovin, mi tin mahni phak tawk theuha fimkhur lehzual chu kangmei chhuak tur venna sawt ber a nih thu a sawi bawk a ni. Kangmei chhuak venna kawnga mipui kan fimkhur lehzual nan Prevention and Control of Fire in the Village ram Act 2000 chu tangkai zawk a hman a pawimawh thu sawiin Sawrkar anga hmalakna piah lamah khawtlang tlawmngai pawl hrang hrangte nen a thawhhona tha neih a tul thu a sawi bawk a ni. Khuallian chuan tunlai khaw ro lai a nih angin ram chhuahnaah emaw, kan veivahnaahte ram tikang thei thil kan hmu a nih chuan, a timittu, a thelhtu nih tum zel turin leh hemi kawngah midangte zirtirtu ni zel turin kalkhawmte a chah a ni. 

Pi.N.Viji, IFS, DFO Kolasib chuan kum 2020-21 chhunga kangmei venna kawnga Kolasib district chhunga hmalakna thenkhat tarlanna hun hmangin Pu. ST.Lalhmingmawia, DLAO chuan kangmei venna kawnga hriattur pawimawh sawina hun a hmang a. Sawrkar department hrang hrang hotute leh NGO hruaitute telin Pu. S.Lalhmachhuana, Prominent Press Representative-in lawmthu sawina hun a hmang bawk a ni.

Kum 2020 chhung khan Forest Survey of India chuan satellite hmangin tum 213 kangmei chhuak angina a chhinchhiah a, heng hmun zau zawng belkhawm hi 217.11 Hactare a ni. Bialtu Range Officer theuh ten a hmun ah an endik nghal vek bawk a ni. Fire Prevention week 2021 hi February ni 8 atangin ni 13 thleng hman tur a ni a, hemi chhung hian kawng hrang hrangin kangmei venna kawnga fimkhur dan inhrilhhriatnate hman a ni dawn a ni.