No.7465/2020-2021

Champhai District Level Fire Prevention Committee buatsaihin ‘Kangmei Ven Hapta’ (Fire Prevention Week) vawi 22-na chu Mizoram hmun dangte rualin vawiin khan Champhai District-ah hman tan a ni.  Kangmei Ven Hapta hawnna hun Kahrawt Field Champhaia neih hi Pu T.J. Lalnuntluanga, Environment, Forest & Climate Change Minister chuan Khuallian niin a hmanpuia, ‘Kangmei tichhuaklo turin mitin i fimkhur ang u’ tih thupui hmanga  kangmei ven hapta hman tur   chu a hawng. Kangmei Ven Kawnga inzirtirna Short Video Clip siam a tlangzarh nghal bawk a ni.

Pu T.J. Lalnuntluanga chuan Kangmei Ven Hapta hawnna hun Champhaia neih a hmanpui thei chu lawmawm tiin, zirchiannain a tarlan danin Champhai district chu ram ngaw tichereu chak leh kangmei chhuah tamna district anih avangin tha thlah lova kan tantlan angai a ni, a ti a. Kangmei chhuak leh ram ngaw tih chereu avanga tawrhna hrang hrang thleng thinte tarlangin, kangmei leh ram ngaw chereu vanga harsatna thleng thinte sutkian anih theihna turin project tha tak ‘Afforestation  of denuded Hills in Champhai District of Mizoram’ siam nih thu leh  NEC in tunhnaiah a pawmpui thu a sawi a. Project kaltlang hian awmze nei zawka ram enkawlte, ram ngaw hloh tawh siam thar, phaizawl Leilet chawm tur tuihna siam leh tui thianghlim in tur siam kawnga hmalak tum a ni, a ti a. Project tha zawk pawh siam zel tum anih thu sawiin, mipuite chu  a hlawhtlin theihna tura tanho puiah a sawma. Kangmei chhuak thinte khawtlang tangrualin chhiatna nasa zawk a thlen hmaa an thelhmit thin chu entawntlak a tih thu pawh sawiin, tlawmngaia kangmei chhuak thelh tura thawkchhak thinte chu fakawm a tih thu a sawi a ni. 

Environment,  Forest & Climate Change Minister chuan Mizoram chu tlang ram nipui laia ro tak anih avangin chenna in leh ram kang kan tuar nasa a, Survey of India-in Satellite hmanga thla a lak atanga a landanin India rama State leh ram tikang nasa ber pawl kan ni, a ti. Chhungkaw tam takin tlangram lo neih eizawnna  atan hmang mahse  buh leh thlai chinna atana vah nilo ram dang kang thinte kan ven a tul takzet ani, a ti bawk. Ram hruaitu, khawtlang hruaitu leh Sawrkar department hotu kalkhawmte chu thunun loh kangmei chhuak thinte ven leh a pawi dante mipuite hnena zirtir thin tura chahin, ram dinhmun leh kangmei ven pawimawhnate hre thar leh theuh turin a sawma. Kangmei ven that vang leh ram ngaw humhalh that avanga  Central sawrkar atanga State sawrkarin lawmman a dawn thin chuan sawrkar leh mipuite nasa taka a puih thu a tarlanga, ram ngaw hal leh tihchereu chu ram budget tlakchhiattirtu pakhat a ni, a ti. 

Khuallian chuan nikum 2020 thal chhungin State pumah kangmei chhuahna hmun 2389 a awm thu leh kangmei chhuakin a nghawng zau zawng chu hectares 3692.124 vel a zau anih thu a sawi a. Champhai District-ah kum 2020 chhungin kangmei tum 76 chhuak vanga ram hectare 786.6 a zau a kangral thu tarlangin, heng zinga 61 chu Lo/Leipui/Huan kang vang anih thu leh Forest Area kang tum 4 a thlen thute a sawi a. Mimal leh mitlemte te’n ram leh khawtlang dan pawisa lova mahni hamthatna duh vang chauha ram an tikang lui thin chu ngaihmawhawm a tih thu leh demawm a tih thu a sawia, kangmei tichhuaklo tur leh kangmei laka inven dan zirtirna chu mitinte thleng phaka zau leh zuala kalpui  a tul  a ni, a ti a. Champhai District mipuite chu kangmei ti chhuak lo tur leh a lo chhuah palh pawha theihtawp chhuaha thelh vat tum turin chah a. Kanmgmei ven hapta hman thin chuan mitinte thinlungah fimkhurna tuh se a duh thu sawiin, tul lova kangmei tihchhuah leh thunun loh mei tihchhuah kawnga mipuite zirtira tithangharhtu anih ngei beisei chungin Kangmei Ven Hapta, 2021 a hawng a ni. 

He hun kaihruaitu Pi Maria C.T. Zuali chuan khua a thal chhoh leh tak avangin kangmei laka mitinte kan fimkhur zual a ngai a ni, a ti a. Kangmei ven kawngah mitinte tanrual a tul tak meuh thu sawiin, midangte zirtir chhawngtu nih tum theh turin mipuite a sawm a.  Tun thal chhoah kangmei chuak lo tura theihtawp chhuah a tul thu sawiin, Champhai district mipuite chu kangmei ti chhuak lo tur leh kangmei ven leh thelh kawngah neitu nihna thinlung pu chunga thahnemngai taka thawk turin a ngen nghal a ni. 

He hunah hian Pu Lalduhthlana, DFO Champhai & Member Secretary, District Level Fire Prevention Committee chuan report a pe a. Champhai District bikah kum 2021 chhungin kangmei tum 3 a chhuah tawh thu leh Hlawnchindum hnara thleng vek anih thu a sawi a. Kangmei chhuak vangin ram hectare 65 vela zau a kang thu leh ram tikangtu ni a rinhlelh lakah Champhai Police Station-ah FIR thehluh anih thu a sawi a. Kum 2021 chhunga hmalakna leh hmachhawp hrang hrangte a tarlang bawk.  

Pu F.Lalchhandama, Station Officer, Fire & Emergency Services Champhai  chuan kangmei chhuah theih dan leh kangmei chhuak  laka chet lak dante sawifiahin, kum 2019-2020 chhungin Champhai Town Area-ah chhungkaw 6 luahlai In 4, cheng nuai 10.71 hu a kangral thu leh kum 2020-2021 chhungin In mal ding 2 kangah bungrua cheng nuai 3.2 hu a kangral thu a tarlang a. Kangmei chhuah thulha rang taka kangthelhtute biakpawh theihna tur Champhai Fire Station Contact Number-7628029288 a tarlang bawk. 

Pu PC. Lalrawnliana, Secretary, Sub Hqtrs. YMA Champhai kaihhruainain kangmei ven kawnga intiamkamna lak a ni a. Pu Lalhmingmawia Pachuau, President, MJA Champhai District chuan lawmthu sawiin  hun a khar a ni. 

Forest Survey of India (FSI) in kum hnih dan zela an buatsaih thin India State of Forest Report (ISFR)-2019 in a tarlan dan chuan December 2017 atanga February 2018 chhunga Satellite data leh a hmuna zirchianna atanga hmuhchhuah danin Mizorama ram hring (Forest Cover) awm zat chu 85.41% a ni a, Champhai District bikah 78.09% niin, District zingah a hniam ber a ni. Hemi hun chhung vek hian Mizoramah Forest Cover Area chu Sq. kilometre 180.49 in a kiama, heng zinga  Sq. kilometre 115.21 a zau chu Champhai District chhunga mi niin,  State chhunga a kiamna za zela 64 dawn lai chu Champhai District chhunga thleng a ni.   Forest Survey of India (FSI) report hmasa India State of Forest Report-2017 tarlan danin Mizorama Forest Cover Area awm zat chu 86.26 % anih laiin kum 2019 ah chuan 85.41% a ni a, Forest Cover Area kiamna hi za zela 0.85 a ni. 

Vawiin Champhaia Kangmei Ven Hapta 2021 hawnna hunah hian Covid-19 vanga inkaihhruainate zawm chunga hun hman a ni a. Head of Offices, Champhai District-a VC, YMA, MJA, MUP, MHIP, CNC, Yamaha Riders leh Buffalo Riders-te leh sawm bikte an tel a ni.