No.7464/2020-2021
Kangmei venna atan leh ram kang a awm loh nana kumtin kar khat chhung hman thin Kangmei Ven Hapta chu vawiin khan Chief Secretary Pu Lalnunmawia Chuaungo an ATI Auditorium-ah a hawng.
Chief Secretary Pu Lalnunmawia Chuaungo chuan Mizoram chu India state te zinga ramngaw nei tha pawl ber anih laiin ram vah leh thing kiha lo leh huan siama eizawng an la tam avangin ram hi a bua telh telh a, lo tana kan vah bak ram pawh a kang fo thin a, chu bakah fimkhur loh avangin ram kang pawh kan nei tam thin a, heng te hian ram hi a ti bua zual a ni, a ti. Kumtin ram hala tlangram lo neih dan a tlem zel nan a hmun sawn lova lo leh huan neih settled cultivation uar a nih theih nan Sawrkarin Wet Rice Cultivation te, Terrace Cultivation te leh adang te pawh a ruahman a mahse heti chungin tlangram lo neih dan hi kan bansan thei lova, chuvangin Kangmei Ven Hapta hi a pawimawh hle a ni, a ti.
Chief Secretary chuan kangmei ven kawngah YMA leh VC ten Sawrkar hmalakna an tawiawm that thu te, an thawhhlawk zia leh an tangkai zia thu te sawiin hemi kawngah hian thawhona tha an neih zel a beisei tih a sawi a. Kangmei Ven Hapta puala hma lakna leh zirtirna ten kangmei ven kawngah kawng ro a su a, awareness pawh tun ai nasa leh zawka kan beih a ngai a, hemi kawngah mitin theihtawp kan chhuah tlan a pawimawh hle a ni, a ti.
Hapta hawnnaah ah hian Pu Jitendra Kumar, IFS, PCCF (P&D) chuan thu hmahruai a sawi a. Pu Liandawla, IFS, Principal Secretary & PCCF leh Member Secretary, State Level Committee on Fire Prevention chuan Sub Committee on Fire Prevention in kumina Fire Prevention Week hman dan leh hemi hnuaia hma lak tum dan tlangpui a sawi a. Pu Liankima Lailung, APCCF (Wildlife) & Chief Wildlife Warden in lawmthu sawiin hun a khar a ni.
He Hapta hi February ni 13 thleng a awh dawn a, kumin Hapta thupui atan ‘kangmei tichhuak lo turin mitin i fimkhur ang u’ tih hi hman a ni.
Chief Minister kaihhruaina hnuaia din State Level Committee on Fire Prevention hi kangmei ven kawnga hmalatu sang ber niin a hnuaia Environment, Forest & Climate Change Minister kaihhruaina a din Sub-Committee on Fire Prevention hi awm leh a, District tinah hma latu District Fire Prevention Committee te an awm bawk a ni.
Nikum chhung khan Mizoram hmun hrang hrang 1300 chuang velah kangmei chhuak nia chinchhiah a ni a, chung zinga hmun 210 chu ramngaw kang a ni a, a bak 1090 chu lo leh huan kang te leh bawlhhlawh halna hmun te an ni a. Heng kangmei chhuak in a ram a tihchhiat leh nghawng chu hectare 3614 zau niin hectare 289 chu ramngaw kang a ni.
