No.7463/2020-2021

Vawiin khan Fire Prevention Week (Kangmei Ven Hapta) 2021 chu Lawngtlai DC Conference Hall-ah Lai Autonomous District Council-a Chief Executive Member Pu Manghmung Chinzah chuan a hawng.

LADC CEM Pu Manghmung Chinzah chuan kangmei chhuak tam zawk chu fimkhur loh vang a nih thu sawiin, fimkhur tura inzirtir a la tul hle a ni, a ti a. Inchhungkhura electric leh gas hman danah te, lo hal chungchangah leh ram vahnaa mei chhem kawngah te kangmei a chhuah loh nana fimkhur a tul a, hei hian kangmei chhuak thei tam tak lakah mi a vengin, ram nuam leh mawi zawk siamna atan awmze thui tak a nei dawn a ni, a ti. Kangmei ven kawnga hma lakna chu mi tiha dah mai lo va, mahni ngeiin a taka kan thawh a, kan nunpui a pawimawh hle a ni tih sawiin, LADC CEM chuan Lawngtlai District mipuite chu kangmei ven kawnga mahni hma zawna theih tawp chhuah theuh turin a chah nghal a ni.

He Week hawnna hi Lawngtlai District Level Committee on Fire Prevention (DLCFP) Chairman, Lawngtlai Bawrhsap Dr Andrew H. Vanlaldika'n kaihruaiin, BCM Lawngtlai East Bialtu Pastor Rev. Laltanpuia Colney chuan hunserh a hmang a. Chairman kaihhruaiin mipui kal khawmte chuan ram tikang lo tur leh ramngaw leh nungchate humhalh tura thutiam an sawi rual a. DLCFP Member Secretary, LADC-a District Council Conservator of Forests Pu K. Lalromawia'n report pein, Chhimtuipui Wildlife Division-a Deputy Conservator of Forests Pu Samson Thanruma'n lawm thu a sawi bawk.

Vawiin Fire Prevention Week hawnnaah hian sawrkar department hrang hrang leh LADC-a officer te, VC leh tlawmngai pawl ai awhte an tel a ni.

Fire Prevention Week hi Mizoramah kum 2000 atang khan hman tan niin, kumin hi a tum 22-na a ni a. Kum 2009 atang khan district leh village level fire prevention award sem tan niin, Mizorama district hrang hrang zingah Lawngtlai District hi kum 2010 & 2015-ah pakhatna, kum 2019-ah pahnihna leh kum 2014-ah pathumna a lo ni ve tawh a. Nikum 2020 khan COVID-19 hri leng avangin award hi sem a ni lo thung.