3573/2022-2023
Kolasib dated 14th February 2023: Vawiin khan DC Conference Hall, Kolasibah District Level Monitoring Committee on CSS – FPO Formation chuan thutkhawmna neiin Kolasib district chhunga hmalak tawhnate thlirletna hun an hmang a. Pu John LT Sanga, Deputy Commissioner chuan hun kaihruaiin Pu JD Traite, DDM, NABARD chuan ‘Formation & Promotion of 10,000 Farmer Producer Organization’ chungchang sawi zauna hun a hmang bawk a ni.

Thutkhawmna a tarlan danin Clover Organic Pvt. Ltd. kaltlangin Thingdawl Rural Development Block hnuai ah a thawh khatna atan Dragon Fruits tharchhuah leh hralh chhuah kawng a hmalakna chu kalpui a ni a. Vangmawi Organic FPO-ten hma lain state pawn a thawn chhuah turte in ruahmanna siam a ni a, amaherawh chu thawn chhuak tur a sawngbawlna hrang hrangah senso a hautak avangin beisei angin ruahmanna a hlawhtlin tak loh thu Clover Organic Pvt. Ltd. a thawktute chuan an sawi a. Ruahmanna thar, senso tlem zawk leh loneitute tan a hlawk zawk tur duan mek a nih thu tarlan a ni bawk.

National Agricultural Cooperative Marketing Federation of India atanga thawktute chuan Bilkhawthlir RD Block-a Tel Antam (Rape Seed) leh Vaimim a hmalakna kalpui dan tur ruahmanna an duan te tarlanna hun an hmang a. Mizoram district hrang hrang zingah Kolasib district chu vaimim thar chhuah tam lam ah dinhmun pahnihna an luah mek thu tarlan niin Chemphai, Buhchangphai leh Bilkhawthlirahte chhungkaw 200 chuangin vaimim an chin thu sawi a ni.

Pu John LT Sanga, Deputy Commissioner chuan sawrkar laipui ruahmanna a loneitute chawikanna tur,’Formation & Promotion of 10,000 FPO’ chu hlawhtling ngei tur a kalpui a nih theih nan District Level Monitoring Committee chuan an hmalaknate a enpui zel tur thu a sawi a. Ei leh in a kan ram a intodelh theih nan leh kuthnathawktute dinhmun chawikanna hmanraw tangkai a nih ngei theih nan thahmenngaitak a hma la turin kalkhawmte a chah bawk a ni.