3572/2022-2023
Champhai, the 14th February, 2023: Jal Jeevan Mission Project Management Unit, PHED Mizoram leh PHED Champhai WATSAN Division-te tangkawp buatsaih, Pump Operator-te pual training February ni 14-18, 2023 chhung awh tur chu vawiin chawhma dar 10:00 khan I&PR Auditorium, Champhaiah District Water & Sanitation Mission (DWSM) Chairman Pu James Lalrinchhana, District Bawrhsap ni bawk chuan a hawng.

Khuallian Pu James Lalrinchhana chuan Champhai District chhunga PHE Department hmalak hrang hrangte leh thawktute inpekna chhuanawm a tih thu sawiin, State Sawkar leh Central Scheme kaltlanga hmalaknate chu khawtlang leh ram tana rohlu tak tak a ni, a ti a. Sawkarin hmasawnna ruhrel tha leh ropui tak takte sum tam tak sengin siam thin mahse, a enkawl zui leh cheithat zel kawngah neitu nihna kan put loh chuan kar lovah a chhe mai dawn a, hemi a nih avang hian enkawltu turte zinga mi operator-te an pawimawh hle a ni, a ti bawk.

Bawrhsap chuan Pump Operator kalkhawmte chu training hun chhunga zirtirna leh hmanrua an dawn turte tangkai taka hmang thei tura ngaihven turin a fuih a. Thiamna tak tak, a taka chhawr tangkai ngei theih tur zir tum tlat tur leh training petu mithiam zawkte atanga thil tam tak zir tum turin a chah a. Khaw khat aiawha kalkhawm, tui thianghlim pek kawnga rawngbawlna pawimawh tak changtute an nih angin, mamawh huna che chhuak thei reng an ni tih inhriaa theihtawp chhuah tum turin a sawm a. An thiamna tifiahtu tur certificate dawng tlak nih tum tur leh training zawh hnuah an hnate tui leh hlim taka thawh tum theuh turin a chah a ni.

Hawnna hun hi Er. ZD Dengthuama, EE, PHED Champhai WATSAN Division & Member Secretary, District Water & Sanitation Mission chuan kaihruaiin kalkhawmte lawmna thu a sawi a. Champhai District-ah nizung chakna hmanga tuilakna 18 kalpui mek a nih thu tarlangin, Village Water & Sanitation Committee kaltlangin mahni khaw tuilakna enkawl thei tura khaw mite zirtirna pek mek zel a nih thu a sawi a. Harsatna lian tham, khawtuala chinfel mai theih loh a awm chuan hma la turin Department a inhuam reng dawn thu a sawi bawk.

Training bultan niah hian Er. C. Zothansanga, SDO Khawbungin IC Engine chungchang a sawifiah bakah Pu Kaleba Lalhruaizela, JE-in Electric Power System chungchang a zirtir a. Heng bakah hian training chhung hian Er. Vanlalmuanawma SDO Champhai, Pu Sujit Das, Electrician, Pu Lalhmangaiha Pautu, JE leh Pu Vanlallawma Colney, JE ten zirtirna an pe dawn bawk a. Training chhung hian Nizung chakna, Diesel leh Electric Motor hmanga tui pump chhuah dante bakah Multimeter hman dante an zir dawn a. Field Visit kaltlangin Greater Champhai Water Supply Scheme leh Kelkang Water Supply Scheme (Solar pumping) te tlawhin a hmunah zirchianna an nei dawn bawk a ni.