3571/2022-2023
Kolasib dated 14th February 2023: Vawiin khan District Aids Prevention & Control Committee, Association for Voluntary Blood Donation, District Blood Bank leh NSS Unit, Kolasib district tangkawpin ' Valentines Day Blood Donation Camp 2023' an buatsaih a. Program hawnna hun hi Govt. Kolasib College Auditorium-ah neih a ni a, Pu John LT Sanga, Deputy Commissioner chuan khuallian niin a hmanpui a. Pu R.Lalramchhana, President, AVBD, Kolasib Branch-in hun a kaihruai a ni.

Khuallian Pu John LT Sanga, Deputy Commissioner chuan Valentines Day chu induhsakna, inngainatna leh inhmangaihna lanchhuahtirna ni pawimawh tak a nih thu sawiin inngaizawngte pual bik ni loin kan hmangaih leh kan duhsak zawng zawng, kan nu leh pa te, kan unau te leh kan thian thate thlengin a huam thu a sawi a. Induhsakna leh inhmangaihna lanchhuahtirna ni a dam lo leh mamawhte tan a thisen petu nih chu a ropui thu khuallian chuan sawiin thalaite chu a tul hun a thisen pe thei zel tur a mahni hriselnate enkawl uluk turin a chah.

Pu T.Zahmingliana, Principal, Govt. Kolasib College chuan kalkhawmte lawmna thu sawiin Govt. Kolasib College zirlaite tan a thisen pekna hun tha DAPCC, AVBD, Blood Bank leh NSS Unit hmalakna a buatsaih a ni chu lawmawm a tih thu a sawi a. NSS Unit, Govt. Kolasib College-a zirlaite chu Youth Parliament Competition-ah titha pawl an nih thin thu leh kum 2023-ah an zirlai zingah pakhatna dinhmun hauh an awm thu sawiin Parliament-ah thusawina hun te siam sak a nih tur thu a sawi.

Dr. Lalthanzami, Medical Officer, OSTC chuan HIV hrik inkaidarh dan te, inven dan te, a veite enkawlna kalpui dan te sawi zauna hun hmangin AIDS natna chu ram leh hnam tichhe thei natna hlauhawm tak a nih avangin zirlaite chu fihlim turin zirtina a pe a. Pu Laltanzuala, Secretary, AVBD in lawmthu sawina hun a hmang bawk a ni. Kolasib District Blood Bank-ah hian thisen Unit 150 a dahthat theih a, kum 2022-23 chhung khan dam lo tisen mamawhte hnen ah unit 1400 vel pek chhuah a ni.