655/2022-2023
Kolasib dated 27th May 2022: Vawiin khan DC Conference Hall, Kolasibah 'Thing phun la, Tuihna siam rawh' tih thupui hmanga June ni 11, 2022-a 'Green Mizoram Day 2022' hman dan tur relin thutkhawmna neih a ni a. Pu John LT Sanga, Deputy Commissioner chuan hun kaihruaiin Pi Margaret Lalramchhani, DFO chuan Green Mizoram Day hman tawh dan tlangpui tarlanna hun a hmang bawk a ni.

Thutkhawmnaah hian Kolasib district-a kum 2021 'Green Mizoram Day' pual a thing țiak 5,987 phun te vil zui a nih dan sawi ho a ni a, Department, NGO leh mimal anga thing phun kalpui țhin enkawl chhunzawm țha te hnenah lawmman buatsaih ni se tih rel a ni. Tuihna humhalhna kawnga hmalakna kalpui a țul thu sawi niin thutkhawmna chuan Tuichhuahen leh Serlui kam a ram ngaw siamthat leh nan thingphun beihpui kalpui tur a rel a ni a, a vil zui dan tur ruahmannate sawi ho a ni. Kangmei chhuak tur ven kawnga hma la țha khua thlanchhuahte hnenah 'Green Mizoram Day' ni hian lawmman sem nise tih a rel niin a thlanchhuah dan tur tehfung hrang hrangte sawi ho a ni bawk. Ram ngaw humhalhna leh thing phun kawnga kum thum a zawnna hma la tha mimal emaw pawl emaw hnenah ‘Green Mizoram Award’ pek thin a nih thu tarlan niin lawmman dawng thei awm mi an awm a nih chuan Divisional Forest Office, Kolasibah hriattir ni se tih rel a ni bawk