1645/2026-2027

Kolasib, 4th August, 2026: Vawiin khan CMO Office Chamber, Kolasib-ah National Deworming Day (NDD) lo thleng tur atana inbuatsaihna leh rulhut hlo sem dan tur sawiho a ni.

He hunah hian hun kaihruaitu Pu RK Lalthlanuana, Chief Medical Officer (CMO) Kolasib chuan thu sawiin, naupangte hriselna atana rulhut hlo pek a pawimawh chhan hrang hrangte a sawifiah a. Rulhut hlo hi kum khatah vawi hnih - February leh August thlaah te sem thin a nih thu sawiin, kumin February thla khan hlawhtling taka sem zawh a nih tawh thu a sawi.

August thla atana National Deworming Day hi August ni 10, 2026 khian hman a ni dawn a. Hemi ni hian district chhunga sikul hrang hrang, college leh Anganwadi centre-ahte rulhut hlo hi a huhova sem a ni ang. Heta la ve hman lo te leh sikul kal lo te chu August ni 17, 2026 (Mop-Up Day) ah ASHA worker ten an in lamah theuh an sem chhunzawm leh dawn a ni. August 2026 atan hian Kolasib district chhungah hlo dawng tur (target beneficiary kum 1 atanga 19 inkar) mi 32,400 an awm a ni.

Thutkhawmna a rel a nih angin Kumin August thla atana NDD Launching Programme hi August ni 10 zing dar 10:00 ah Govt. Primary School-III, Venglai-ah neih tur a ruahman a ni.

Rulhut hlo (Albendazole) pek dan tur ruahman hi kum 1 leh kum 2 inkar naupangte hnenah 200mg (a chanve) pek tur a ni a, kum 2 chin chunglamte hnenah 400mg (a pum) pek tur a ni. Rulhut Hlo hi naupangte himna turin a eitu turte hmaah ngei eitir tur a ni.

Report-a tarlan a nih danin, kumin February 2026-a rulhut hlo sem runpuiah khan Kolasib district-ah target 32,139 atangin mi 31,890 hnenah hlo hi pek an ni a, za zelah 99.23% lai hlawhtlinna  neih a ni. Rulhut hlo hi sem zawh a nih hian August ni 19, 2026 ral hmain sikul leh Anganwadi Centre ten an bialtu Sub-Centre leh Clinic-ah te report an thehlut vek tur a ni bawk.