Vawiin khan Kolasib District chhunga MLA inthlan buaipuitu tur Polling Party 43 te chu an duty na hmun theuh panin Kolasib DC Office atangin an chhuak leh ta a. Polling station 76-a duty tur zawng zawngte chuan zanin hian an duty na hmun theuh an riahchilh dawn a. Sectoral Magistrate tura ruat te pawhin an duty na hmun tur theuh an thutchilh tawh bawk a, venhimna uluk tak hnuaiah naktuk hian Vote thlak a ni dawn ta a ni. Vawiina polling party te chhuahlai hian DC Pu Jitender Yadav, IAS bakah Addl. DC Pu Lalfela Sailo te chuan an awmchilh a, observer te pawh an awm bawk a ni. Nimin tlai Dar 4 atanga Campaign hun khar a nih atangin boruak a daiin campaign thawm hriat tur a awm lo a ni.

Vawiina polling party chhuakte hi Kolasib khaw pawn leh khaw chhunga duty turte an ni a. Kolasib District chhunga Polling station Motor luh lohna awm chhun Rastali khua chu inthlan dawn avang hian DRDA, Kolasib chuan ngawrh takin an siam a. Nimin khan siam zawh a niin he khua a motor tlanlut hmasa ber chu nimin vek khan a lut a, Election Observer 4- Tuirial constituency Narmdeshwar Lal, IAS leh amah enkawltu LO Pu Stephen Auhmun te an chuang a ni.