RotaVirus Vaccine chu vawiin khan Kolasib Hmar Veng Clinic ah pek chhuah tan niin Bawrhsap Pu Zoengsanga’n pekchhuahna hun a hawng a ni.
He huna khuallian Bawrhsap Pu Zoengsanga chuan Diarrhoea(Kawthalo) chu naupang damlohna leh thihna thlentu natna lian tak a ni a, India ramah hian kumtin mi maktadui 208 velin an vei thin a, naupang nuai 1 velin an thih pui bawk thin ani ati. Heng kawthalo zing a za a sawmli (40%) vel chu Rotavirus vang a lo awm a ni a, heng Rotavirus natna avang hian kumtin cheng tluk leh dingawn 5 vel India ram hian kan seng ral thin a ni a ti bawk.
He Rotavirus hi mihring leh mihring, boruak atangin a in kai darh theih a, sanitation leh hygiene tha ringawt hian min veng lo a ni tiin antibiotic a enkawl dam chi pawh a ni lo a Kawthalo a nih chuan ORS leh Zinc a enkawl dam a ngai a ni tih a tarlang bawk.
Bawrhsap chuan mipui te kan vannei hle a ni tiin vaccine to tak, vawikhat ei pawh cheng sang chuang man chu a thlawna dawn theih ani a Chuvangin he vaccine dawng thei te chu la zel turin a sawm a ni.
Rotavirus hi naupang kawthalo thlentu pakhat ani a, he hrik ina a tihbuai naupangte chu khawsik, luak chhuak leh kawthalo ten a zut a, ni 1 atanga ni 3 inkar chhungin a rawn lang chhuak thin a ni. Hemi hri danna tur hian Rotavirus vaccine chu naupangte pek an ni dawn a, Vaccine hi tum 3 (thum) lak tur niin (tum khat ah far nga thlawr tur) kar 6, kar 10 leh kar 14 a upa an nih in naupang ka a thlawr tur ani. vaccine lak zawhah pawh naupang chu a khua a sik, luak, tap bang theilo leh pum na emaw pum puar emaw a nih chuan bialtu Doctor pan vat tur a ni. Rotavirus vaccine hian naupang kawthatlohna chhan pui ber natna hrik lakah a veng a, India Rama naupang maktaduai 30 chuang hnenah pek tawh niin side effect engmah hmuh a niloa , he hri avanga kawthalo awm thin chu nasa takin a tlahniam a ni.
He vaccine hi India ram ah leh khawvel hmun dangah pawh pek tawh ni in Mizoram ah tun August thla atang hian pek tan ve a ni dawn a ni. Kolasib District ah chuan Primary Health Centre zawng zawngah he hri danna hi a lak theih dawn a ni. Dr.RK Lalthlamuana, District Immunization Officer chuan Sawrkar damdawi ina natna hri hrang hranga laka indanna/venna la tura nu ten mahni fa te an kalpui/lakpui hian sum tam tak an hum thin a, chhungkaw harsa zawk te tan chuan thil hlu tak ani tih a tarlang bawk.
