Vawiin chawhma khan Central Sub-Centre Chanmari, Lunglei ah kawthalo hridanna pekna hun Launching of Rota virus Vaccine in Routine Immunization Programme hun hman ani. Dr. Thani Pachuau, Chief Medical Officer, Lunglei chuan khuallian niin naupang thlaruk hnuailam te hnenah  vawikhatna atan Rota virus Vaccine pekna hun a nei ani.

Kawthalo hridanna pekna hun hi Pi P.C Duhveli, District Programme Officer, ICDS, Lunglei chuan kaihruaiin Dr. Thani Pachuau chuan kan tu leh fate hriselna kawng ah Lunglei District hian hridanna hrang hrang ah hma kan sawn hle a, sorkar in mipui tan hriselna kawng tam tak a chhawpchhuah te hi kan la hmang tangkai tawk lo hle a, Central Sponsore Scheme chhawpchhuah te hi atam thei ang ber hmang tangkai turin kalkhawm te achah ani. Nuten hridanna kan lak te hi eng natna atana kan lak nge tih hre theuh turin a duh thu a sawi a. Hriselna hi Health Dept. chauh hian a ti hlawhtling thei lova Line Dept. hrang hrang te nen a thawhhona tha neih angai ani ati. Dr. Thani Pachuau hian Lunglei District a ahmasa ber atan Lalmuansanga tlakhat S/O Lalmuanpuii, Chanmari, Lunglei hnenah kawthalo hridanna ape ani.

Dr. Lalrinthangi, SMO, Lunglei pawhin thusawiin Mizoram ah hian hridanna hrang hrang chi 9 kalpui ni tawhin a 10 na atan hridanna thar Rota virus Vaccine (kawthalo hridanna) a vawikhat nan pekna hun hman ani hi lawmawm ati a. Naupang damlo 40% hi Rota virus vang anih avangin India ram State 11 ah hridanna kalpui tawhin a12 atan Mizoram ah kalpui tan ani ati. Khawvel pumpuiah naupang kum 5 hnuailam 10% thihna hi kawthalo vang niin India ram ah kumtin naupang nuai 1 thi an awm thin ani ati. Kum 2018 khan Mizoram ah naupang kawthalo vanga thi 1 chiah a awm a, ei leh in tha bakah kut silfai zirtirna kan kalpui hian sawtna tam tak a thlen a ni ati bawk. Nu in naute thla 6 chhung hnute tui pek hian natna tam tak lakah a ven thu sawiin hridanna lak avang hian zenghi, tetanus te hi hmuh tur a awm tawh lo ani, Rotavirus lak hi ahim ani ati bawk. Lunglei District chhunga khaw 14 a naupang kum 1 hnuailam mi 245 hnen ah hridanna pek tum ani.Rotavirus Vaccine hi tum 3 lak tur ani a, kar 6,10 leh 14 ah naupang ka a far 5 thlawr tur ani.