Mizoram District dang ang bawkin Village Council Inthlanna nimin a neih tak chu Kolasib District ah pawh tluang taka neih a ni a. Vote tla te hi chhiar nghal niin vawiin chhun lamah khan result kimchang tarlan theih a ni.

Tarlan tawh angin Kolasib District huamchhungah hian Village Council 52 a awm a, chung zinga Village Council 6 - North Chawnpui, North Hlimen, Phainuam, Saihapui V, Saiphai leh Saipum ah te invaunna avangin V/C Inthlanna atan hming pe lut an awm loh vangin Inthlanna buatsaih theih a ni lova. Village Council 1 (Kolasib Electric Veng) chu Uncontested-a tlinga puan an ni lo tawh a. Nimin khan Village Council 45 ah te chuan inthlanna hi tluang zawhfel a ni.

Kolasib District chhunga Party hrang hrang in hnehna an chan dan chu - INC in V/C 23; MNF in V/C 8; ZNP in V/C 2; BJP in V/C 1 te a ni a; Village Council 5 ah Independent candidate ten hnehna changin Village Council 7 ah party hrang hrang candidate te inhneh tawkin an in draw a ni.

Kolasib District ah hian Village Council Roll- ah voters 45, 440 awmin, nimin Inthlanna a vote tla zawng zawng chu 33,533 a ni a, vote tlak that dan, polling percentage chu za zela 73.80 a ni. Vote tlak thatna ber chu Serkhan Village Council niin za zelah 92.66 vote a tla a, vote tlak tlemna ber chu Vairengte I Village Council niin za zelah 60.90 vote a tla a ni.