4236/2024-2025

Kolasib, 2025 February ni 13: Nimin, February ni 12, 2025 (Nilaini) khan Kolasib District chhunga village council (VC) 60 ah tluang takin inthlan vote thlak zawh niin, vote tlate pawh chhiar zawh fel tawh a ni.

Kolasib District-ah hian Village Council 60 a awm a, Kawnpui IV VC ahhian chuhtu an awmlo a ni. Kolasib District VC 60 ah te hian voter 63350 - mipa 30404 leh hmeichhia 32946 an awm a. Nimin khan ballot ah vote 45782 a tla a, mipa 22060 leh hmeichhia 23722 ten vote an thlak a ni. Ballot-a vote tla zawng zawng hi za zela 72.27% a ni a. Inthlannaa mawhphurhna nei (Persons on Election Duty) te chhiar telin vote tla zawng zawng 46029 niin, ballot leh PED vote tla belhkhawm hi za zela 72.66% a ni ta a ni.

Kolasib District chhungah hian Village Council seat 302 – General 228 leh Reserved 74 a awm a. District pumah ZPM in seat 131 an la a,MNF in dawt in seat 93 an la a, INC in seat 73 an la bawk a ni. Final result a a lan danin, ZPM in VC 23 ah seat an la hnem ber a. MNF-in dawtin VC 14 ah an chak a, Pathumna INC-in VC-10 ah hnehna an chang bawk a ni. Tun dinhmunah Village Council 12 ah sawrkarna siam thei party an la awm lo a ni.

Kolasib District-a VC inthlanpui 2025 buatsaihah hian ballot paper hmangin zing dar 7-ah vote thlak ṭan niin, tlai dar 4 thlengin vote thlakna hun hawn a ni a. Tlai dar 4-a vote thlak zawh hman lohna hmun ṭhenkhatah chuan vote thlak hun hi pawh sei a ni bawk a. Vote thlak zawh fel hnu zan lamah, zan dar 7 aṭangin vote tlate hi returning officer (RO)-te kaihhruaiin constituency tina counting hall ṭheuhvah chhiar nghal niin, chhiar zawh a nih veleh RO-te'n result puangin, thlan tlinte hnenah thlan tlin an nihna lehkha an hlan nghal a. Inthlanna hmanrua leh lehkha pawimawh zawng zawng chin fel a nih hnuah Kolasib DC office panpui nghal zel a ni.

CONSOLIDATED RESULTS CONSOLIDATED RESULTS.pdf