4237/2024-2025

Lunglei, 2025 Ramtuk thla ni 13: Vawiin khan Lunglei District Agricultural Marketing Committee (DAMC) huaihawtin Lunglei District Horticulture Conference Hall-ah thlai thar lei leh hralh chungchanga society leh secondary collection centre (SCC)-te tana inkaihhruaina, "Standard Operating Procedures for Societies & SCCs under Agricultural Market Assurance Scheme in Mizoram" zir hona buatsaih a ni a. Lunglei District Additional Deputy Commissioner Pi Rochuangkimi Khenglawt chuan khuallian niin hun a hmanpui.

Khuallian Pi Rochuangkimi Khenglawt chuan sawrkarin mipuite tana a ruahmanna a taka kalpuina turah kut hna thawktu intel khawm (society) member-te mai bakah, department lama thawktute tan pawh thil thar a nih avangin te lua awm lova hriat ngai zawng zawng hre chiang tura zir hona chu hman tangkai a pawimawh thu a sawi a. Thlai thar lei chungchangah line department hrang hrangte'n SCC buaipui tur an ruat tawh tih sawiin, a leitu lam leh hralhtu lamte felfai tak leh fimkhur taka an indawr theih nan society-te chu an pawimawh dawn hle tih a sawi a. Sawrkar policy "Bana Kaih" hlawhtlinna chu department-a thawktute ai mahin, a taka hmang tangkaitute kutah a innghat tam dawn a ni tiin, society-te chu theih tawp chhuah turin a chah a ni.

He hun hi Lunglei DAMC Member Secretary, District Agriculture Officer Pu VL Hmangaihchhunga chuan a kaihruai a. Lunglei District-ah thlai thar hralh tur chhek khawmna, secondary collection centre (SCC) pariat (8) a awm thu leh thlai leitu turte pawh an inpeih fel tawh thu sawiin, SCC chu tlawh chhuah vek a nih tawh thu leh a viltu tur pawh dah tawh a nih thu a sawi.

He hunah hian Mizoram Agricultural Marketing Board (MAMB) Co-opted Member & Master Trainer Pu Lalnunpuia chuan thlai thar hralh dan tura sawrkarin ruahmanna a siam dan leh a kalpui dan tur te, SCC chungchanga hriat tur pawimawh hrang hrangte a zirtir a. Zawhna leh chhanna leh sawi hona hun hman a ni bawk.

Lunglei District chhungah hian tun dinhmunah DAMC hnuaiah secondary collection centre 8 - Tawipui 'N' I, Haulawng, Hrangchalkawn, Buarpui, Thenhlum, Marpara 'S', Phairuangkai leh Tlabungah te ruahman fel tawh a ni.