4238/2024-2025

Lunglei, 2025 Ramtuk thla ni 13:  Vawiin chawhma khan Lungleia dragonfruit chingtute'n an thlai thar chhuahte man bithliah (rate) felfai leh man man zawka an hralh chhuah theih nan District Horticulture Office, Lungleiah Mizoram Dragonfruit Farmers' Association (MIDFA), Sub-Headquarters Lunglei leh Tawitlang Farmers Producers Company te chuan kumina dragonfruit thar chhuah, lei leh hralh chungchanga inremna (Memorandum of Understanding - MoU) an ziak.

He an inremnaah hian Lunglei District chhunga thar chhuah dragonfruit tha chu MIDFA Sub-Hqrs, Lunglei te hnen atangin Tawitlang Farmers Producers Company te hian kilogram khat Rs 130/-in an leisak dawn a ni. Inremna an siam hian ni 30.11.2025 thleng a huam dawn a. Dragonfruit lei turte hi a grade then a ni dawn lo va; amaherawchu, a pum hmin tha leh him chauh an lei dawn thung a ni. Dragonfruit thar chhuahte lak khawm, thliar fel, buk leh hralhna hmun atan Mualthuam 'N', Pukpui leh DHO Office, Lungleiah collection centre dah tum a ni bawk.

He inremna hi 1st Party, a hralhtu lam, MIDFA Sub-Hqrs Lunglei ai awhin President Pu R. Lalthanmawia leh Secretary Pu Lalramengmawia te'n hming ziakin, 2nd Party, a leitu tur lam, Tawitlang Farmers Producers Company ai awhin Chief Executive  Officer Pu Lalthlamuana Sailo leh General Manager Pu Vanlaltanpuia te'n hming an ziak thung a. Lunglei District Horticulture Officer Pu B. Lalzarzova leh Lunglei District Commerce & Industries Officer Pu F. Lalsawmliana te'n an hriatpui bawk a ni.