4239/2024-2025

Lunglei, 2025 Ramtuk thla ni 13: Vawiin khan Lunglei District AIDS Prevention and Control Committee (DAPCC) chu an Chairman, District Bawrhsap Pi Navneet Mann hovin a hna thawh pindanah an ṭhu khawm a. Mizoram State AIDS Control Society (MSACS) leh School Education Department thawh dunnaa private middle school, high school leh higher secondary school zirlaite zinga HIV/AIDS darh zel tur leh ruihhlo hman sualna venna tura Adolescent Education Programme (AEP) ruahman hnuaiah Lunglei District leh Hnahthial District-a zirtirtu training thawh hnihna (2nd batch training) buatsaih tur chungchang an sawi ho.

Adolescent Education Programme hnuaiah hian private sikula zirtirtu pahnih (mipa leh hmeichhia) thlan chhuahte chu training pek niin, he'ng zirtirtu training zote hian an zirlaite HIV/AIDS leh ruihhlo laka an fihlim theih nan anmahni sikul ṭheuhvah hma la a, zirtir chhawng tura beisei an ni a. Hemi atan hian nikum 2024 March thla khan 1st batch, Lunglei District-a private sikul 33-a zirtirtu 66 chu training pek tawh an ni a. An hma lak zui dan pawh vil zui zel a ni.

2nd batch atan hian 1st batch-a tel lo, private sikul la bak zawng, Lunglei District-a sikul 23 leh Hnahthial District-a sikul 14, a vaiin sikul 37-a zirtirtu 74 chu training pek leh tur a ni a. Training hi Lunglei DEO Conference Hall-ah March ni 4 - 6, 2025 (ni thum) chhungin buatsaih tum niin, master trainer 3-te'n module 30 hmangin zirtirtu training hi an pe dawn a ni.

Vawiin ṭhut khawmah hian training buatsaihna atana thil ṭul leh pawimawh hrang hrangte sawi ho a ni a. AEP hnuaia sikul thlan chhuahahte hian a taka hma lakna a ṭul anga vil zui bakah, zirlaite'n an hlawkpui dan zir chian nan feedback questionaire buatsaih ni se, tih a ni.

Attachment

  • Loading attachment...