4240/2024-2025

Lunglei, 2025 Ramtuk thla ni 13: Nimina a nawlpui ruala vote thlak ve theih lohna, Lunglei District chhunga 30-Lalnutui Village Council Constituency-ah chuan vawiin February ni 13, 2025 (Ningani) zing dar 7 leh tlai dar 4 inkarah khan vote thlak niin, vote awm zawng zawng 192 aṭangin vote 167 (86.98%) a tla.

Lalnutuiah hian vanduaithlak taka candidate thi a awm avangin State Election Commission (SEC) chuan ruahmanna thar siamin, vawiin khan vote thlak a ni a. Seat 3 (general seat 2 leh reserved seat 1) awmah chuhtu candidate 10 (general 8 leh reserved 2) an awm a. Vote nei mi 192 (mipa 94 leh hmeichhia 98) awmin, vote 167 (mipa 82 leh hmeichhia 85) a tla a. Hei hi vote awm zawng zawng aṭangin 86.98% a ni.

Heti hian Lunglei District-a village council (VC) 88 leh local council (LC) 24-ah te tluang takin inthlan buatsaih zawh fel a ni a. VC pahnih - Sailen leh Sumasumi-ahte chuan vote thlak ngai lovin, inthlan chuhtu awm chhunte chuh buaitu awm lo (uncontested)-a tlinga puan an ni a. Hei vang hian nimin leh vawiin khan VC 86 leh LC 24-ah vote thlak a ni.

Nimin leh vawiina inthlan vote thlakna VC leh LC 110-ah hian vote nei mi 92,861 (mipa 45,861 leh hmeichhia 47,000) awmin, polling station-ah vote 69,735 (mipa 34,357 leh hmeichhia 35,378) a tla a. Hei hi vote awm zawng zawng aṭangin 75.10% a ni a. Inthlan nia vote tla bakah hian inthlan duty turte vote lo thlak lawk, PED (persons on election duty) vote 718 awmin, a vaia belh khawmin vote 70,453 (75.87%) a tla a ni.

VC 86-ah voter 51,650 (mipa 26,498 leh hmeichhia 25,152) awmah inthlan niah vote 41,389 (mipa 21,258 leh hmeichhia 20,131) tlain, inthlan nia vote tla hi 80.13% a ni a. PED (persons on election duty) vote 147 awmin, a vaia belh khawmin vote 41,536 (80.42%) a tla a ni. VC02064-Silkur-ah vote tla ṭha berin, vote awm zawng zawng 604 aṭangin vote 579 (95.86%) a tla a. VC02085-Zawlpui-ah vote tla chhe berin, vote 890 aṭangin vote 510 (57.30%) a tla thung.

LC 24-ah voter 41,211 (mipa 19,363 leh hmeichhia 21,848) awmah inthlan niah vote 28,346 (mipa 13,099 leh hmeichhia 15,247) tlain, inthlan nia vote tla hi 68.78% a ni a. PED (persons on election duty) vote 571 awmin, a vaia belh khawmin vote 28,917 (70.17%) a tla a ni. XI/1-Lungpuizawl LC-ah vote tla ṭha berin, vote awm zawng zawng 485 aṭangin vote 409 (84.33%) a tla a. IX/1-Lunglawn LC-ah vote tla chhe berin, vote 2,543 aṭangin vote 1,536 (60.40%) a tla a ni.