Kolasib District Aids Prevention and Control Committee (DAPCC) Member te chuan Kolasib District chhunga AIDS chungchanga hmalak dan tur ngaituahin Chairman leh Bawrhsap ni bawk Pu Zoengsanga kaihhruaina hnuaiah vawiin khan DC Conference hall ah an thukhawm.

Bawrhsap Pu Zoengsanga chuan HIV/AIDS natna bakah ruihhlo chi hrang hrangin Mizote min run nasa em em mai a, chhungkaw kehdarh leh fahrah tam tak a siam a, kan tluk sawp hma hian tan lak a tih takzeta do a hun ani a ti. Kolasib District chu HIV/AIDS hluarna hmun ani a he natna hlauhawm tak lak a kan fihlim theihnan bakah tun dinhmuna min chenchilhna te umbo turin inhrilhhriat tam leh chak zawka hmalak a ngai a, Health Department mawhphurna chauh ni lovin Department hrang hrang tanrual a ngai a, khawtlang leh chhungtin ten mawhphurna kan nei theuh ani tiin a zau thei ang ber leh zing thei ang bera awareness kalpui a ngai ani a ti. 

School Drop out bakah lehkhathiam hna hmulo awlthawng tak tak, thisen lum si an tam a, damdawi inchiu emaw sex hman chhin duhna rilru te a piang thei a, heng ho hian tanpuina leh kawng dik kawhhmuh an mamawh ani tiin HIV/AIDS do na kawngah theihtawp chhuahpui turin kalkhawm member te a sawm a ni.

Thutkhawmah hian HIV/AIDS hluarna chhan bulpui chu damdawi inchiu nan hriau thianghlim lo hman bakah mipat-hmeichhiatna (unsafe sex) anih thu tarlan ani a, zirchianna atangin thalai kum 15 leh kum 34 inkarah a hluar ber tih hmuhchhuah a ni. Kolasib District ah hian Kum 2002 atanga June 2019 thleng khan mihring 63,498 thisen test tawh niin mi 1242 te chu positive tih hmuhchhuah an ni a, heng zinga 1124 te chu general client (sex worker, damdawi khawih thin etc) niin mi 118 te chu nu nau pai lai (pregnant women) an ni.

Thutkhawm chuan School, Sports Centre bakah khawtlang ah te YMA puihna in awareness campaign neih thin nise tiin a rel a, School drop out leh thalai awm awl (vulnerable youth) te chu nun kawng dik an zawh theihnana thiam thil nei tura zirtir (skill development) chu UD&PA hnuaia zir tur chi hrang hrang awmah zirtir dan tur kawng dap nise tiin a rel bawk. Hemi bakah hian Anganwadi Centre hrang hrangah nu nau pai lai bakah thalai te tan HIV/AIDS chungchang inzirtirna hun remchang awm apiangah hun hman thin nise tih a rel bawk a ni.

Thutkhawm ah hian Department hrang hranga Officials te leh khawtlang hruaitu DAPCC member te an kalkhawm a, DAPCC thutkhawm hi quarterly a neih thin tur niin he thutkhawm hi tun Sawrkar kuma (financial year) thutkhawm vawikhatna a ni.

Attachment

  • Loading attachment...