Vawiin hian Serchhip DC Meeting Room ah kan hma August ni 15 a lo thleng tur India ramin zalenna a hmuh champha lawm dan tur relin Pi Sangchhin Chinzah, Bawrhsap hovin I-Day Celebration Committee te an thukhawm.

Pi Sangchhin Chinzah chuan, Independence Day chu India ram tana ni pawimawh leh hriatreng tawh tur ni a. Serchhip ah pawh kum tina kan tih thin angin urhsun taka hman kan tum ang a. Chumi atana mamawh chi hrang hrang leh mawhphurhna chi hrang hrangte a awm tel dawn avangin Department hrang hrangten theihtawp kan chhuah tlan leh a ngai dawn a ni, a ti a. Member kal khawm te hmaah lawmthu a sawi a ni.

Addl DC Pu Chuauhnuna’n nikum lama he ni Serchhip a an lo hman tawh dan te report a pek zawhin kumina a hman dan tur sawihona neih nghal a ni a. A hmun atan Khawtetlang Field thlan leh niin zing dar 11:00 am ah tan tur a ni anga, chhun dar 12:00 noon ah DC Bungalow ah At Home Tea Party neih zui a ni ang. Khuallian hi sawrkar in a la rawn ruat dawn a ni. Parade Contingent hi Band Party te nen 17 awm tura ruahman chhin a ni a, kum danga tih tawh thin angin Independence Day Football Tournament pawh District Football Association te nena tang hova buatsaih leh tur  a ni bawk ang.

Independence Day hlawhtling taka hman anih theih nan Committee hian mawhphurhna hrang hrang te chipchiar takin a sem nghal a ni.