2411/2025-2026

Kolasib, 27th November, 2025: Vawiin chawhma dar 11:00 khan DC Conference Hall, Kolasib-ah Kolasib District AIDS Prevention and Control Committee (DAPCC) chu an Chairman Pu Chinlianmanga, Election Officer kaihhruainain an thukhawm a. District chhunga HIV/AIDS dinhmun leh World AIDS Day hman dan tur te an rel.

He hunah hian Dr. R.K Lalthlamuana, Sr. CMO hnen atangin Kolasib District chhung HIV dinhmun (April - October 2025) presentation ngaihthlak a ni a. Report a lan danin kumin April atanga October thla chhung khan Kolasib District-ah HIV Positive mi 43 hmuhchhuah thar an ni a, heng zinga mi 6 te chu nu naupai (pregnant women) niin, mi 37 dang te chu General Client an ni. HIV positive hmuhchhuah thar zingah hian kum 25 atanga 34 inkar (age group) an tam ber a ni.

Meeting-ah hian World AIDS Day 2025 lo thleng tur hman dan tur uluk taka sawiho niin, ni 29.11.2025 (Inrinni) zing dar 7:00 hian Kolasib Venglai Bazaar-ah hman ni se tih rel a ni. He hunah hian Pu Robert C. Lalhmangaiha, Deputy Commissioner chu Khuallian (Chief Guest) atan sawm a ni a, Dr. RK Lalthlamuana, Sr. CMO in thu a sawi bawk ang. Programme hi Dr. Lalthanzami, MO OSTC, District Hospital in a host ang a, zaithiam Eunice Rosangpuii (Mizo Idol Top 20), Zorinanga leh HD Lalruatfeli te an zai ang. Kumin World AIDS Day thupui atan ‘Harsatna kara AIDS hmachhawn dan tur’ tih hman a ni ang.

Hei bakah hian Krismas leh Kumthar vuakvet lo thleng turah district chhung mipuite himna tur leh inzirtirna a darh zau zawk nan School leh Kohhran hrang hrangah HIV/AIDS chungchang inzirtirna thuziak thawn chhuah ni se, devotion leh assembly hun remchangah chhiar chhuah thin ni se tiin rel a ni bawk.

Vawiin meeting hi Pu Lalbiakzuala Khiangte, District Programme Manager (DAPCU) in lawmthu sawina hun hmangin a khar a ni.