2412/2025-2026

Siaha, 27th November, 2025: Vawiin chawhma dar 11: 00AM khan DC Mini Conference Hall- ah District Agriculture Marketing Committee (DAMC) chuan an Chairman leh District Bawrhsap ni bawk Pu VL Hruaizela Khiangte kaihruaiin thutkhawm an nei.

Pu VL Hruaizela Khiangte chuan Member- kal khawmte hnena lawmthu sawiin, tluang tak leh felfai taka Siaha district chhunga Sawhthing thar chhuahte hralh a ni thei chu lawmawm a tih thu tarlangin, a buaipuitute zawng zawngte fakawm a tih thu a sawi a. Chairman- chuan loneitute leh official- te zingah hmingchhiatna awm miah lova Sawhthing hralh leh buaipui a ni chu lawmawm a tih thu sawiin, kum lo kal lehzel turah pawh thawhhona tha tak nena hma lakpuiah official- te a sawm nghal bawk.

Thutkhawmah hian thil pawimawh tak tak sawiho a ni a. Mizoram sawrkarin Buyer - Seller Meet 2025, December Ni 5 - 6, 2025-a Aizawla a buatsaih turah Sawhthing chi hnih - Thînglaidum leh Thîngpui entir ni se, Aieng leh Hmarcha phochhuah ni bawk se an ti a. A buaipuitu turin DAO leh DHO- te ruat an ni. Siaha District chhunga Secondary Collection Centre (SCC) pahnih te dinhmun leh an hnathawh dan thlirletna neih a ni bawk a. SCC pahnihte hi hman zui a rem dawn loh thu Member secretary Pu R. Lalrinawma’n report - a pek angin, Siaha leh Tipa-ah Secondary Collection Centre - thar siam nise tih a ni a, supervisor pawh department hrang hranga mi inruat belh nise an ti, a ni.

Vawiin thutkhawmah hian Mizoram sawrkarin February 2026 atangin sawhthing lei tuma a inbuatsaih thu tarlan niin January – July, 2025 chhungin Siaha district hnuaia SCC pahnih: Siaha leh Tipa-ah sawhthing quintals 2774.09 lei niin hemi atang hian Rs. 1,38,70,450.00 sen niin, Sawhthing hralhna man atangin Rs. 32,13,799.00 hmuh a ni bawk. Siaha district chhunga sawhthing hralh tam pathumte chu: Lalpekliana, Siahatla II hian quintals 235.58 a hralh a, Lalrammawii, New Siaha West I hian quintals 135.15 a hralh, Vabeichhuakhu, Zyhno B hian quintals 118.93 a hralh bawk.

Thutkhawmah hian District Agriculture Marketing Committee (DAMC) Member- te an tel kim tha hle a, Pu VL Hruaizela Khiangte chuan lawmthu sawina neiin hun a khar.