2413/2025-2026

Dated Hnahthial, the 27th November, 2025: Vawiin khan Hnahthial DC Meeting Hall-ah Bawrhsap, Pi K.Vanlalruati kaihhruaiin District Consultative Committee (DCC), District Level Review Committee (DLRC) leh District Level Security Committee (DLSC) thutkhawmna neih a ni a. Pu R. Lalmalsawma, Lead District Manager, Lead Bank Office, Lunglei chuan July-September 2025 Quarter chhunga bank hrang hrang hmalakna thlirlet tur chhawpchhuakin tan lak ngaihnate sawi ho nghal a ni.

DCC leh DLSC chungchang meeting-ah hian Security lamah harsatna a awm loh thu tarlan niin Social Security Schemes hrang hrangah quarter hmasa aiin hmasawnna hmuh vek a nih thu tarlan a ni a. Ba chhia kan tih mai, Non Performing Assests (NPA) chungchangah pawh hlauhthawnawm khawpa ba chhia nei branch an awm loh thu tarlan a ni bawk. Lead District Manager chuan Branch Manager tinte chu DEAF Account chungchangah mipuite chu awareness lo pe uar turin a chah nghal a ni.

DLRC meeting in chhunzawm nghalin bank hrang hrang CD ratio tarlan a ni a. SBI CD ratio hi 52.57 niin MZRB CD ratio hi 70.01 a ni a, MCAB CD ratio hi 99.8 a ni ve thung a ni. LDM chuan zero balance a account hawn theihna - PMJDY hnuaiah quarter hmasa aia account hawng thar an tam thu sawiin branch manager-te chu tan la zel turin a fuih nghal bawk.

Financial Literacy camp pawh tun quarter chhung khan SBI Hnahthial, MZRB Hnahthial, MZRB Pangzawl, MZRB S.Vanlaiphai leh MCAB Hnahthial ah te vawi thum (3) theuh neih a ni.

Thutkhawmnaah hian Bank hotute, Line Department aiawhte bakah NGO hruaitute an tel a ni.