2414/2025-2026

Aizawl, the 27th November, 2025: Larsap General (Dr) Vijay Kumar Singh, PVSM, AVSM, YSM (Retd) chuan vawiin khan 'Vigyann Se Samruddhi : For Aatmanirbhar Bharat' tih thupui hmanga India Meteorological Department, Aizawl buatsaih 'India International Science Festival (IISF) 2025', December ni 6-9 chhunga Chandigarh-a neih tur khuhhawnna, Meteorological Centre, Aizawla neih chu a hmanpui.

Larsap General (Dr) Vijay Kumar Singh chuan science tihhmasawnna tur leh science thiamnate tangkai zawka hmanga, ram intodelh 'Atmanirbhar Bharat' leh hmasawn 'Vikshit Bharat' ni thei tura hmalakna pawimawh tak, India International Science Festival neih a ni leh tur chu lawmawm a tih thu a sawi a. Science & technology tihhmasawn kawnga PM Pu Narendra Modi leh a changtu Minister Dr. Jitendra Singh te hmalakna chhuanawm a tih thu sawiin, tunah chuan India chu khaw awm dan tur hrilhlawk kawnga hmahruaitu leh ram tam takte ngaihchan a ni, a ti a. Mahni pual satellite siam chhuah mai bakah a awmna tur orbit-a dah thei kan ni chu chhuanawm tiin, India chu khawvel puma nikhata starts-up tan thar ngah ber leh, tun dinhmuna nei tam ber pahnihna a nih thu a sawi bawk.

Larsap chuan science tel lova khawsak leh hmasawn tura hmalam pan a harsat thu sawiin, zirlai kalkhawmte chu science ngaihven zual deuh deuh tur leh ram tana thil thar tha zawk ngaihtuah chhuah tum turin a fuih a, IISF atanga hlawkna hmuh tum turin a chah bawk a. IISF chu Kût mai nilo khawvel huap beihpui thlakna pawimawh tak - zirbingmi, zirlai, entrepreneur, thil thar thlen duhtu leh mipui nawlpuite hmun khata phuarkhawmtu a nih thu a sawi a. IISF 2025 chuan hmasawnna tha zawk siamin helam ngaihvenna thar Mizoramah rawn thlen se a duh thu sawiin, India ram hmasawn, chak leh intodelh siam nana a tangkai ngei a beisei thu a sawi bawk.

Pu K. Lalrammuana, Principal Scientific Officer, Directorate of Science & Technology chuan IISF in science thiamnate hmanga hmasawnna thlen a tum tih sawiin, mitin tana banphak thiamna vawrhlar a tul thu a sawi a. Science thiamna chu zirlaibuah chauh ni lo ataka hman tangkai a tul thu a sawi bawk.

He hunah hian Pu Sudheer Kumar Dwivedi, Director & Head, Meteorological Centre, Aizawl chuan inlawmna thu sawiin, IMD hmalaknate a tarlang a. Larsap thurawn angin IMD, Aizawlin English leh Hindi bakah Mizo tawng ngeia weather forecast an tarlan thu leh Air Quality Index (AQI) pawh an tarlan zel tawh thu a sawi bawk.

India International Science Festival (IISF) hi PM hmathlir bawhzuiin kum 2015 atang khan hman tan a ni a, Science pawimawhna leh hmasawn nana chhawr tangkai dan turte inzirtirna neih thin a ni a. India International Science Festival (IISF) tum 11-na hi December 6-9, 2025 chhung hian Chandigarh-ah neih a ni ang.

Larsap chuan India Meteorological Department, Aizawl leh Mizoram Science Centre, Aizawl hmunhma hrang hrangte tlawhin hmalak dante a enfiahin an hmalakna chhuanawm a tih thu a sawi a, science tihhmasawn kawngah theihtawp chhuah chhunzawm turin a chah a ni.