No.1827/2020-2021

Vawiin chawhnu khan DC Conference Hall, Kolasib-ah Dr H. Lalthlangliana, Deputy Commissioner kaihhruainain Kolasib district huam chhunga Village Council leh Joint VLTF hruaitu hrang hrangte nen Total Lockdown kalpui dan tur chungchang inhrilhhriatna hun hman a ni.

Dr H Lalthlangliana chuan Quarantine Facility enkawl dan tlangpui te tarlangin, Kolasib district chhungah chuan Home quarantine kalpui tum a nih loh thu a sawi a. Facility quarantine a awm mekte leh tangkhang lo haw buaipuitute chu Swab sample lak vek a nih tawh thu a sawi bawk a ni. DC chuan tunhnaia Mizoram mi leh sa tangkhang lo haw zinga Kolasib district mi, Thlawhtheihna emaw, rel leh bus emaw hmanga lo hawte chu khaw chhung rap lovin, Quarantine Facility ah dah nghal thin an nih thu a sawi a, intlawh leh thil inpekte chu Quarantine Facility enkawltute phalna la lo chuan a theih loh thu a sawi. Quarantine Facility a awmte ei leh in leh an mamawh zual te chu pek thin an nih thu tarlangin, mi inphal thenkhatte atangin Quarantine Facility enkawlna tur pawisa leh eitur te pawh dawn thin a nih thu DC chuan a sawi a, Quarantine Facility a awm te zingah an awm chhung ei leh in senso intum pawh an awm mek thu a sawi bawk a ni.

Quarantine Facility a awm te chuan a enkawltute kaltlangin an mamawh zual te an lam tir phalsak an ni a, amaherawhchu pawisa fai a inpek a theih loh a, online banking hmang a inpek tur a ni.

Kolasib district atang hian Swab sample 871 lak tawh a ni a, Quarantine Facility ah hian mi 530 awm mekin mi 700 vel leng tur a Quarantine Facility hi ruahman a ni a. Covid-19 vei mi 41 enkawl theihna tur hmun buatsaih a ni bawk.