No.1826/2020-2021

Dated Champhai, the 9th June 2020 (Tuesday): Vawiin khan Champhai khawpui chhunga inkharkhipna dan tum rukna Lockdown 6.0, June Ni 9, 2020 atanga June Ni 22, 2020 thleng awh tur kalpui dan tur chungchang DC Conference Hall-ah Bawrhsap Pi Maria C.T Zuali hova rel a ni. Meeting-ah hian Pu Rex Zarzoliana SP, Pu Mark Lalthanliana Addl DC, Pu Lalnunfela Chawngthu SDO Sadar, Incident Commander-te, Official dangte, Champhai khawpui chhung VC hotute, MJA, YMA leh AMFU aiawh theuhte an tel a ni.

Bawrhsap leh Champhai District Task Force on Covid-19 Chairman nibawk Pu Maria C.T Zuali chuan Mizoramah Covid-19 vei hmuhchhuah an pun tak zel avanga inkharkhipna dan hman chhunzawm anih thu sawiin, Champhai district chhunga Covid-19 hripui darhzel tur venna kawnga thawktute fawkawm a tih thu a sawi a. State sawrkarin inkaihhruaina dan a siam zulzui chung zela District tana remchang leh tha ber tur thlira sawihona buatsaih ani tiin, kalkhawmte chu inpawhtlang taka sawihona hun hmang turin a sawm a ni. Covid-19 dona kawnga thawhhona tha tak a awm zel a tul thu pawh sawiin, Champhai district mipuite chu lungrual taka thawhhopuiah sawmin, theihtawp chhuaha mahni mawhphurhna theuhte hlenchhuak turin duhsakna a hlan a ni.

Pu Rex Zarzoliana Vanchhawng, SP Champhai chuan Lockdown kalpui chhungin chhunlamah Champhai khawpui chhung hmun 9 ah Police Duty Post siam anih dawn thu sawiin, zan lamah duty Post 3, Vengthlang thla leh Bethel-ah te siam anih tur thu leh Patrolling Team an awm tur thu a sawi a. Mipuite chu dan leh thupek siamte zawm hram hram turin a ngen a ni.

Pu Lalnunfela Chawngthu, SDO (Sadar) in State Guidelines zulzuia Champhai khawpui tana inkaihhruaina dan siam chhin chu chhawpchhuakin a sawifiah a. Uluk taka ngaihtuahhoa siam that ngaite thawmthat anih hnuah pawm a ni a. He Total Lockdown hian Champhai khawpui chhung (Town area) bik a huam ang.

Vawiin thurelte bawhzuiin District Magistrate Pi Maria C.T Zuali chuan Government of Mizoram, DM&R Order No B.13021/101/2020-DMR/Pt-III Dated 8th June 2020 chu District level-ah pawh hman ve nghal tur anih thu leh hemi bakah hian Champhai khawpui huamchhunga Total Lockdown kalpui dan tur chu a hnuaia tarlan ang hian hriattirna a ti chhuak a ni.

A. Hnathawh chungchang:

1. Hmasawn nana hmalakna hnathawh (Department works) leh mimal eizawnna hnathawhna (Brick leh Chow siamna, Bakery, Furniture works, Workshop etc) chu phalna hranpa lak ngai lovin kalpui theih a ni. Amaherawhchu ram chhunga awmsa labour te chauh ruaia thawh tur a ni. Hnathawktu ten ‘SOP on Social Distancing’ zawm chungin hna an thawk tur a ni. Hnathawhna hmunah mi 5 ai tam awm khawm phal a ni lo.

2. In sakna leh hnathawhna kal lai mek pawh an thawh loh avanga chhiatrupna thleng thei thil leh tul zual bik thil a awm anih chuan VLTF te’n DC ah recommend siamin DC atanga permit la in thawh chhunzawm theih a ni ang a, hnathawhna hmunah hian mi 5 ai tam thawh loh tur a ni. Tul bik thila mi 5 aia tam thawh a tul pawhin VLTF hriatpuinain inhlat takah hmai tuam chungin an thawk tur a ni.

B. Tiau kam Balu lak chungchang:

Tiau kama Balu la duh an awm a nih chuan an Balu lak tumna area VLTF te’n recommend siamin DC atang chauhin permit lak theih a ni ang. Permit-ah hian motor number leh a kal turte hming leh address ziah lan tur a ni a. Motor pakhatah driver tiam lovin mi 3 bak kal phal a ni lo ang.

C. Bazar/Dawr hawn dan tur chungchang:

1. Bazarpui chu khar chhunzawm tur a ni a, Chawhmeh bazar hi mahni VC area theuhah a hranpa in siam theih a ni ang a, chawhmeh zuartu ten mahni veng area theuhah inpho/zawrh tur a ni. Amaherawhchu inkarhlat takah seat siam tur a ni a, a dawr tute pawh inkarhlat tak (feet 6 ai hnai lo) ah awm zel tur a ni. Thlai zawrhna hmun hi hmun zawl zau lai – School kawt zawl, inkhelhna field tual emaw ni thei se. VC ten thlai/chawhmeh zawrhna tur an ruahmanna hmunah chauh zawrh tur a ni.

2. Chawhmeh, thlai leh thei te, in lama pek (home delivery) phal a ni.

3. Zing dar 8 atanga tlai dar 5 thlengin (Thawhlehni, Nilaithawhtan leh Inrinni) heng dawrte hi hawn theih a ni ang – Eichawp dawr, Insakna bungrua (Hardware leh Electrical goods) zawrhna.

4. Zing dar 8 atanga tlai dar 5 thleng (Thawhtanni, Nilaini leh Zirtawpni) ah a chunga tarlan bak zawng dawr dang hawn theih a ni ang.

5. Mihring, Ran damdawi dawr leh Agriculture kaihhnawih zawrhna dawr erawh chu kartluanin hawn theih a ni ang.

6. Dawr hawn theihin a huam zingah heng te hi a tel lo – Restaurant leh Thingpui dawr, Spa, Beauty Parlour leh Khawlaia inpho dawr (Street Vending) te. Khawlaia inpho tih hian VLTF ten khawlaia chawhmeh bazar an siam a huam lo ang.

7. Dawr neitu ten an mahni dawrtute feet 6 aia hnai lovah an awm vek tur a ni a, rinbial an siam vek tur a ni.

8. Dawr nghaktu hi mi pathum aia tam awm phal a ni lova, dawr nghaktu zawng zawng ten hmai an tuam ngei ngei tur a ni.

9. Ei siamna Restaurant/Hotel ten Home delivery in an thil siamte chu an awmna veng VLTF recommend hnu ah DC phalna in sem chhuah theih a ni ang a, a sem tute hian DC atangin movement permit an nei tur a ni.

D. Zin veivah leh mipui chet vel chungchang:

1. Champhai Town area chhungah lirthei hmanga chhuah vah khap tlat a ni. Hei hian Sorkar hnathawk duty motor te, ambulance leh medical/veterinary emergency-a hman motor te, Sorkar leh private hospital a thawkte motor, essential commodities phur motor, bank hnathawkte office kalna motor, telecom service duty-na motor, print & electronic media mite motor, kohhran hminga motor register-te, bawlhhlawh paih motor, bawnghnute phurh/semna motor-te leh VLTF duty-te lirthei leh phalna neia bungraw phur motor-te a huam lovang.

2. District pawn lam leh District chhung Champhai khaw pawn kal phalna chu VLTF te recommend na in DC leh Incident Commander ten phalna an pe thei ang.

3. Thingtlang atanga mamawh lam tur leh thil pawimawh tul zual bik avanga Champhai khaw chhung kal ngaite chuan VLTF recommend-na in an bialtu Incident Commander-te hnenah phalna an la tur a ni. Dilna hi Phone leh Whatsapp kal tlangin dil theih a ni ang.

4. Mahni vengchhung veivahna leh tul bik thila khawchhung kalna tur motor permit chu VLTF te’n permit an pe thin ang.

5. Tul bik thil heng - chhiat tawh, damloh leh eizawnna thil pawimawh bik a nih loh chuan zin veivah loh tur.

6. Sawrkar hnathawk motor duty a hmante hian office ID emaw Detailment Order an keng tel thin tur a ni a, an motor-ah chiang takin an thawhna department hming an tarlang tur a ni.

7. District headquarters atanga bungraw thiar chhuak tur leh lalut turte chuan DC atangin phalna an la hmasa zel tur a ni. Hei hian Essential commodities phurte a huam lovang.

E. Mipui Vantlang tana Inkhuahkhirhna Hriattur te:

1. Hemi hun chhung hian mi 5 aia tam punkhawm khap tlat a ni. Hei hian Inneih inkhawm leh Mitthi vui program a huam lovang.

2. Champhai khawpui chhungah phalna neilote chu tumahin mahni in leh compound an chhuahsan tur a ni lo. Hei hian a hnuai ami te hi a huam lovang:

(a) Hminghmerha duty tur a ruat (detailment order nei) sorkar hnathawkte office kal leh haw

(b) Medical leh Veterinary emergency duty leh hospital a thawkte

(c) Bank, insurance, ATM, Postal, telecom service provider hnathawkte

(d) Print & Electronic media, cable leh internet service a thawkte

(e) Bawnghnute sem leh bawlhhlawh paih

(f) Petrol pump leh LPG delivery a thawktute

(g) Supply Department, Agriculture leh Horticulture Department-a thawkte

(h) Courier, Home delivery leh E-commerce service-te leh (Heng mite hian an veivahna tur Movement Permit DC office atangin an nei tur a ni)

F. Sawrkar Office chungchang:

Sawkar Office hawn leh kal dan tur chungchang chu State Guidelines in a tarlan anga kalpui tur a ni.

G. Lo/Leilet/Huan a feh chungchang:

1. Feh turte chuan silai leh nungchate suat theihna tur hmanrua engmah an keng tur a ni lo.

2. Feh turte chu VLTF te’n permit an siamsak tur a ni a, permit-ah chuan an hming, address leh an fehna hmun tur (lo an neihna hmun) leh an feh ni (date) ziah lan tur a ni.

3. Mahni area pawn lam a feh turte chu an va fehna tur hmun a VLTF te hnenah an permit nen an in report tur a ni a, permit neite chu harsatna siamsak loh tur a ni.

4. Feh hun hi kal hun leh haw hun mumal takin VLTF ten siamsak tur a ni. Feh/loa kal te hi an haw hunah VLTF te hnenah an in report tur a ni.

5. Nitin a feh tur chi leh riak tur chi te chu permit-ah thliar hran tur a ni.

H. Pawimawh dang te:

1. Tupawh khawlaia chhuakte reng reng VLTF duty-te tiamin hmai an tuam ngei ngei tur a ni a, feet 6 aia inhnaihin tumah awm loh tur a ni.

2. Lockdown chhung hian mi 5 (panga) aia tam punkhawm khap tlat a ni.

3. Tul bik thil - damdawi lei, buhfai/ration lak, chawhhmeh leh ei bar lei tura chhuah lawk – tih loh ah chuan tumahin mahni in leh compound an chhuahsan tur a ni lo.

4. Tuman khawlaiah chil chhak loh tur, a tilui chu dan ang a hrem tur an ni.

5. Mi panga (5) aia tam punkhawmna heng - Inneih lawmna (reception), lungphun, anniversary leh birthday lawmna, games & sports, book release, politics leh pawl thil a kalkhawmna, intihhlimna chi reng reng te he hun chhung hian huaihawt phal a ni lo.

6. Inneih inkhawm, mitthi vuina leh khawhar inah mi 35 ai tam pun khawm phal a ni lo.

7. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te mahni inchhungah inkharkhip vek tur a ni

8. VLTF duty-naah Post tinah mi 5 aia tam duty loh tur a ni a. Upa Pawl member-te chu duty tir loh nise.

9. Zan dar 7:30 leh zing dar 4:30 inkarah mihring leh motor chhuah khap tlat a ni. Thupek zawm lo te chu IPC Section 188 hmangin hrem tur an ni ang. Hei hian Covid-19 duty, phai atanga essential commodities leh Home department in a phal bungraw phur/unload tute leh DC in a bik a phalna a pek te a huam lo vang.