No.1825/2020-2021

Dated Serchhip, the 9th June, 2020: Vawiin hian Serchhip district chhunga khunghran mekte tana Khawbel leh Thinglian Village Level Task Force Committee te thawhkhawm leh Khawlaillung Dinthar Branch YMA hmalakna hmanga thawhkhawm chawhmeh leh thil dang te chu Dr. Lalzirmawia Chhangte, IAS, Deputy Commissioner, Serchhip District hnenah hlan a ni.

Heng thilpek hlanna hun hi DC Office tualah neih a ni a, Khawbel VLTF aiawhin Pu C. Lallawmkima, Vice President, Khawbel VC leh Pu HS V.L. Thlamuana, Secretary, Khawbel VC te chuan an khaw mipui ten an thawhkhawm chawhmeh leh thil dangte hi an rawn hlan a. An thilpekte chu: Chingit tel 15, Zikhlum changchawr Bag 3, buhfai 150kg, Maian tel 14, Anhling tel 7, Phuihnam tel 12, Antam tel 146, Sawhthing 10kg, Dal 1.5kg, Pawisa Rs. 30 leh thingfak 800 chu District Level Task Force in tul leh remchang a tih anga hman turin District Bawrhsap hnenah an hlan a.

Thinglian VLTF aiawhin Pu Lalthantluanga, Vice President, Branch YMA leh Pu Jerome Hminthansanga, VC Secretary te chuan thilpek hi an rawn pe a: Antam tel 158, Thingthupui tel 59, Phuihnam tel 3, Ankuangdum tel 5, Maian tel 2, Rambahra bag 2, Lairawk tumbu, thei rah leh sawhthing te an rawn pe a ni.

Khawlailung Dinthar Branch YMA aiawhin Rev. Lalhmunliana Royte, Branch Adviser, Pu Lalremkima, Asst. Secretary leh Nl. C. Lalrinpuii, Treasurer te chuan Antam bag 5, Kurtai 10 kg leh Phuihnam an hlan a. Tin, kar kalta khan Leng khua Village Organisation chuan DLTF Committee hnenah hian Antam leh Maian thahem tak an lo hlan tawh bawk a ni.

Bawrhsap chuan heng mamawh chi hrang hrang petu mipuite leh khawtlang hruaitute inpekna chu fakin, lawmthu a sawi a. An thilpek te hian nasa takin sawrkar a chhawk zangkhai tih a sawi a ni.