Vawiin khan Kolasib District Constituency pathuma inthlan duty tur Presiding Officer te leh Asst. Presiding Officer te chuan St. John’s Higher Secondary School Auditorium-ah Training vawi thumna leh a hmawr bawkna an nei a. EVM leh VVPAT hman dan pawh he hunah hian inhrilh hriatna nei leh nghalin inthlan ni a thil tihtur hrang hrang hrilhfiahna Polling Day Monitoring System/ SMS pawh in zirtir nghal a ni.

Training programme ah hian Pu R. Lalnghakliana, EO/ Training Observer chuan thuhma sawiin Presiding Officer leh Asst. Presiding Officer te chu an pawimawhna hrechiang turin a chah a. Felfai taka inthlanna kalpui a nih theih nan an tihtur te rinawm taka ti theuh tur leh diklo leh felhlel a awmlohna tura fimkhur tura thil ti turin a ngen a ni. Pi K. Vanlalruati, SDO (S), Pu Lalrinawma, Election Master Trainer, Pu JH. Lalrimawia, SDO, Vairengte leh Pu Lalchhanhima, SDC ten training an pe a. Zawhna engemaw zat chhawp chhuahte chu heng officer te hian an chhang nghal bawk a ni.

Kolasib District ah hian MP inthlan hmachhawn turin ruahmanna te peih fel thawkhat a nita a. Hetih lai hian EVM leh VVPAT hman dan chungchang hre chiang duh tan DC, Kolasib chuan vawiin April 4 atanga April 8 thleng khian a hman dan zir theih turin DC Conference Hall-ah office hun chhungin a hawng reng a ni. Naktuk khian BLO te tan training neih leh a ni bawk ang.

Naktip April 6, Pathianni zing dar 7 khian Polling party te kalna tur tihchianna randomization neih a ni ang a, chhun dar 12 ah inthlanna hmanrua te lak chhuah a ni ang. April 7 (Thawhtanni) ah Polling party 9, hmun hlaa duty turte chuan EVM la chhuakin an duty na an pan ang a, a tuk April 8th ah polling party 68 ten an duty na an pan leh dawn a ni.