299/2025-2026

Dt. 23rd April, 2025: Vawiin chawhnu dar 1 khan Kawnpui leh Sihphir inkar kawngpui chei that (repair) mek leh Bilkhawthlir leh Saipum inkar kawng siam mek chungchangah Kolasib Bawrhsap Pu Robert C. Lalhmangaiha hovin DC Conference Hall, Kolasib-ah meeting neih a ni a. Kawngpui siam meka hnathawh dan leh hma lak zel dan tur an sawiho.

He meeting hi Kolasib DC Pu Robert C. Lalhmangaiha chuan kaihruaiin, MJA, Kolasib District hruaitute thahnemngaihna azarah Kolasib District kawngpui siam meka hna thawh dan te, mipuite tana harsatna thleng mek te leh hma lak zel dan turte sawihova meeting koh a nih thu sawiin, MJA, Kolasib District President Pu Andrew Vanlalauva chu thurel tur sawi hawng turin a sawm a. MJA President-in thu a sawi zawh hian Sakawrhmuituai Group YMA President Pu R. Laldingliana pawhin hemi chungchanga YMA-te hmalakna leh an ngaimawh thilte a sawi bawk a. Committee-a koh tel ve A. Kannabiran, AE, 74RCC leh Kawnpui leh Sihphir inkar kawng siam mek hnathawktu BRN Infrastructure, Ptv. Ltd aiawhtu Pryanshu Kumar-te chuan kawng siam meka hnathawh dan leh harsatna an tawhte an sawi bawk a ni.

Kawnpui leh Sihphir inkar tlang kawng siam mek hi a enkawltu BRTF leh Contractor BRN-te hian kumin May ni 31 hmaa zawh hman an tum thu sawiin, kawng an siam mekah mimal leh pawl thenkhatin an duh dana kawng siamtir tum an awm fo avang leh tawng inhriat pawh that tawk lohna avanga harsatna an tawh thu te, khawl chhiatin a part nghah chhung a rei thin avanga duh anga hna an thawh chak theih loh thu te an sawi a ni.

Kawnpui leh Sihphir inkar kawng siam mek chak zawka hnathawh a nih theih nan leh mipuite tana harsatna siam lo zawnga hna an thawh theih nan Committee chuan contractor-te chu tlai lam dar 5 atanga zan dar 12 thleng kawng danga hnathawh tum turin an ngen a. Hei hi BRTF thuneitu sang lamin sawihovin, an thutlukna chu Kolasib DC hnenah thlen leh tura tih a ni a. 

Kawngpui siam mekah tuiluankawr (side drain) thuk tak maia siam chu kawngpui a zim avangin lirthei tlante tan a hlauhawm thei a, chuvangin tuiluankawr hi lai lovin, awih tlan (V-shape) a siam turin Committee chuan BRTF leh BRN-te hi an ngen bawk a. A theih chen chenah kawngpui chu tuna metalled road chin aia zauh belh hram turin an ngen bawk a. Committee chuan kawngpui siamtute chu an contract agreement-a inziak angin, tha taka hna thawk tura hriattirin, harsatna an neihte chu khawtlang hruaitute leh Police-te hnenah thlen thin turin hriattir an ni a; an harsatna an thlenna tur contact number-te pawh pek nghal an ni bawk.

Hei bakah hian Bilkhawthlir leh Saipum inkara kawngpui siam mek chungchang pawh Committee-ah han sawi a ni a. Pu Lalthanpuia Khiangte, SDO PWD, Bilkhawthlir chuan report a pe a. He kawngpui siamtu contractor-ten an enkawl zui hun tur - Defect Liability Period (DPL) chu a la tawp loh avangin contractor-te chu na zawka nawrin, kawng chhe lai siam tha tura hriattir ni se tih a ni a. Lei dawh mek te, leimin avanga kawngpui chhe laite pawh chak zawka bawhzui ni se tiin, helai kawng dinhmun hi a hmunah Committee-in en fiah ni se an ti bawk a ni.

Kolasib District chhunga kawngpui chei that mek chungchang ngaihtuaha Committee-ah hian Pu David H. Lalthangliana, Sr SP, Kolasib; Pu R. Lalduhthlanga, Sr EE, PWD-te bakah Sub-Hqrs YMA President leh Secretary, MJA, Kolasib District President leh Secretary, MUP, District Hqrs. President; Sakawrhmuituai Group YMA President leh Secretary-te an tel a ni.