Kolasib District hmun hrang hranga Police Department ten a tul anga an hman tur kawngpui danna (Barricade) 10 (sawm) vawiin khan Kolasib DC Pi Niharika Rai, IAS chuan SP Pu Madhur Verma IPS hnenah a hlan.
Barricade 10 tehi Project Director, DRDA Kolasib in a siam te an ni a. Heng Barricade tehi thir tha chi hmanga siam vek an niin MGNREGA fakna leh mipui te hnena zirtirna thuziak chuantir a ni a, a sirah Mahatma Gandhi thlalak chuantir a ni a, barricade pakhat hi ` 6600/- man a ni.
Hlanna inkhawm tawite DC Conference Hall-a neiha thu sawiin Pi Niharika Rai chuan, Barricade thar chu kan Police ten lirthei tlan dan mumal taka an vil theihna tur a nih rualin mipui zahlo tak leh duhdah taka lirthei khalh tih rehna tur te, misual leh mi hnawksak manchhuah kawngah tea puitu tha tak a ni dawn a ni, a ti a. Chumi bakah a thuziak MGNREGA chungchang mipui chhiar theih tura tarlan a ni chu sawrkar laipui scheme ropui tak mitin tana siam tihlarna tha tak a nih avangin a dahna hmun apiangah awmzia a nei thui hle dawn a ni, a ti a. Thingtlang leh khawpui ah pawh a tangkai hle dawn a ni, Pi Rai chuan a ti a ni.
Pu Madhur Verma, Supdt. Of Police chuan nitin an hnathawhna kawnga puitu tur tha tak Barricade 10 lai mai an dawng chu DC leh a siamtu Deptt. hnenah lawmthu hrilhin Dan leh thupek kenkawhna kawnga thui tak puitu tur a ni, a ti a.Tullo taka lirthei chak tak taka khalh thin te lo tihdina an chunga dan lekkawh a ngaih fo thin avangin heng kawngpui danna changkang tak hi an mamawh tawh hle a ni, a ti a. Hmanraw remchang apiang hmang mai lova barricade tha tak an hmang tur chu a phurawm hle a ni, a ti. Sualna tamtak man chhuak tura an thawhna kawngah pawh hei hi a pawimawh hle a ni, Pu Verma chuan a ti bawk a. MGNREGA scheme tih chak nana thil tangkai tak a ni nghal dawn bawk a ni, a ti.
Barricade hlanna hunah hian Pi Lianhmingi Pachuau Project Director, DRDA leh Pu Zairemmawia, Addl. DC. te pawh an tel a ni.
Ruahman ang chuan Barricade thar te hi Kolasib khawpui bakah Vairengte, Bairabi, Phaisen leh Saiphai khua-ah te dah tum a ni.
