974/2026-2027

Kolasib, 12th June, 2026: Vawiin chawhma khan DC Conference Hall, Kolasib-ah Bilkhawthlir South Village Council Bye-Election, general seat pakhat inthlanna neih tur atana Draft VC Roll tlangzarh a ni.

He hunah hian Kolasib Election Officer Pu Chinlianmanga chuan kalkhawmte lawmna thu sawiin Revision of VC Draft Roll chu a tlangzarh a. Electoral Registration Officer (ERO) Pu Vanlalbiakzauva leh Assistant Electoral Registration Officer (AERO) Pu Samuel Lalmalsawma Sailo te chuan Draft Roll chungchang leh roll-a inziahluh thar laia fimkhur ngai te sawi zauna an nei bawk.

Election Officer Pu Chinlianmanga chuan thu sawiin, Bilkhawthlir South-a Village Council Bye-Election (general seat pakhat) inthlan a awm dawn avanga he Draft Roll hi tlangzarh a nih thu a sawi a. Mipui rorelna tichiang lehzual tur chuan kum 18 tling tawh phawt, roll-a inziak lutte chuan a tam thei ang bera vote an thlak a pawimawh thu a sawi. "Roll rintlak kan neih theih nan political party te, khawtlang leh tlawmngai pawl hruaituten tun tuma Draft Roll tlangzarh hi ngun taka lo endik a pawimawh hle a ni," a ti bawk.

Vawiina Draft VC Roll tlangzarh hi 'Final Electoral Roll, General Election to Village Council, 2025' behchhana buatsaih a ni a. June ni 12 atanga June ni 24, 2026 chhung hian inziahluh thar leh siamthat ngai awmte (claims and objections) chu thehluh theih a ni ang. Henga siamthat ngai leh endik ngaite tihfel a nih hnu, July ni 7, 2026-ah Final VC Electoral Roll hi tlangzarh tura ruahman a ni.

Draft VC Roll tlangzarh taka a lan danin, Bilkhawthlir South-ah hian mipa voter 998 leh hmeichhe voter 1049 awmin, an vaiin voter 2047 an awm a ni. Vawiin a Draft VC Roll tlangzarhna hunah hian District Level Standing Committee member-te, ERO, AERO, political party aiawhte leh tlawmngai pawl (NGO) aiawhte an tel tha hle a ni.