Vawiin khan Kolasib District chhungah MLA inthlanna tluang taka neih a ni a. Tlai dar 5 thleng khan District chhung constituency pathuma Vote tla hi za zelah 78.8 a ni a, Tuirial Consty ah 80.4, Kolasib Consty ah 80.4 leh Serlui Consty ah 78.2 a tla a ni. Tlai dar 4 rik hma a polling area a lut vote la thlak hman lo engemaw zat te chuan he thu ziahlai thleng hian vote anla thlak a ni.

A tlangpui thuin Kolasib District chhungah hian inthlanna a muanawm a. Boruak duhawm lo hriat tur a awm hran lo. Rengtekawn polling station-a EVM chu zing dar 8: 44 khan a chhia a, hetah hian Vote 28 a tla hman a ni. Sectoral Magistrate leh Polling official ten hei hi rang taka a thara an thlak hnuah zing dar 9 : 00 ah Mock poll neiin a hnu dar 9: 15 ah vote thlak zui a ni a, vote tla tawh sa 28 pawh rin zui a ni.

Kolasib khaw chhungah hian polling station 18 a awm a, a bak zawng polling station 58 chu Kolasib khaw pawnlam a ni. Polling station 15 chu critical-a puan a awm bawk. Vawiina Pollingt station hrang hrang tlawh kualtu Police Observer Syed Alfat Hussain, IPS chuan In thlan dawn hnai leh vote thlak nia boruak chi hrang hrang a thlir kual atangin Mizoram inthlanpui boruak chu Muanawm leh felfai, State dangte tan pawha entawn tlak, Model State a ni, a ti a. MPF leh NGO te thawh dan chu ropui a tih thu a sawi a ni.

Polling party te hian zanin hian Kolasib an thleng kim tura ngaih a ni.