266/2024-2025 

Kolasib dated 18th April 2024: Nimin khan Pu John LT Sanga, Deputy Commissioner, Kolasib chuan mipui hip thei tur a chei mek, Govt. Kolasib High School-a 'Unique Polling Station' a tlawh a. Pi Christina Lalmuanzuali, Election Officer leh Pu Hmingthanzuala, DIPRO, SVEEP Nodal Officer-te chuan an tawiawm a ni.

He hun ah hian Pu John LT Sanga, Deputy Commissioner chuan thutharlakhawmtute kawmin mipui pung zel leh khawpui thang zel avangin tui mamawhna a pun zel thu a sawi a. Tui inrenchem inzirtir nan leh ruah tui khawl pawimawh zia phochhuak thei turin Kolasib a 'Unique Polling Station' chu chei a nih thu sawiin Polling station chung ah chuan khawl hmang a tui far tir niin chu tui chu awlsam tein tui dawn a lo lak khawm leh mai theih a nih dan entirna siam a nih thu a sawi. Kum lam a upate vote thlak tur a an lo kalin an ṭhut hahdamna tur di, mau leh thing hmang a chawlhbuk siam a nih thu te, mizo thil hlui remchang ang ang mipui thlir theih tur a pho chhuah a nih tur thu leh Vote thlak pawimawhna leh tui renchem pawimawhna phochhuah thei tur thlalakna hmun te pawh buaisaih a nih thu sawiin peihfel a nih hun ah Govt. Kolasib High School-a Polling Station danglam bik chu tlawh theuh turin mipui a sawm bawk a ni.

He hunah hian Pu Hmingthanzuala, DIPRO leh Pu Samuel Lalrinawma, Lecturer, SVEEP Resource Person-te chuan DIET, Kolasibah leh Govt. Kolasib High School-ah kum 18 tling tharte leh tling mai turte tan Systemic Voter Education and Electoral Participation kaltlangin 'Young Voter Awareness Program' an neih pui a. Vote thlak pawimawhna te, mipui duhthlanna tichiang tur a vote nei zawng zawngten vote an thlak a ngaih nachhan te, Election Commission of India hnuai a inthlanna kalpui a nih ṭhin dan inhrilhhriatna hun te hmangin Voter Awareness Quiz-te an neih pui bawk a ni.