2579/2022-2023
Kolasib dated 9th November 2022: Vawiin chawhma khan DC Conference Hall, Kolasibah Pu John LT Sanga, Deputy Commissioner chuan Draft Roll 2023-a tlangzarh a. January ni 15, 2022 a Electoral Roll a voter awm zat aiin vawiin a Draft Electoral Roll tlangzarh ah hian voter 165 in an pung a, za zelah 0.26 in voter an pung a ni.
Pu John LT Sanga chuan India ram chu khawvel a inthlang ram lian ber te zing ami a nih thu leh mahni aiawh a rorel tur thlanna chu chanvo pawimawh tak a nih thu a sawi a. India khua leh tui tha ni tur chuan vote thlak ngaih pawimawh a tul thu leh vote thlak ngaih pawimawhna ram ah chuan mipui duhthlanna chiang taka a lan thin thu a sawi bawk a ni.

Pu Gaston Vanlalhriatpuia, Election Officer tarlan danin Kolasib district chhunga Assembly Constituency 3 awm ah hian voter 62775 an awm a, ni 15 January 2022-a Electoral Roll tlangzarh aiin voter awmzat hi 165 in an pun belh a ni. 4-Tuirial (ST) AC ah hian voter 18336 an awm a, 5-Kolasib (ST) AC ah voter 23543 awmin 6-Serlui (ST) AC ah voter 20896 an awm bawk a ni. Kolasib district pum ah hian mipa voter 30404 awmin hmeichhe voter 32371 an awm a, mipa 1000 zelah hmeichhe voter 1065 an awm a ni. Electoral Roll-a hming chuang zawng zawng zingah kum 20 leh 29 inkar an tam ber a, voter 19684 an awm a, kum 80 chung lam voter 604 awm anga chhinchhiah a ni. Bru voter, Tripura Roll-a hming ziaklut tawh mi 79 te chu E-roll atangin paih a nih thu Election Officer chuan a sawi bawk a ni.

Draft Electoral Roll-a hming ziah luh thar leh siamthat ngaite siamthat hun chu ni 8, December 2022 thleng hian hawn a ni ang a. Hemi hun chhunga dilna lut hrang hrangte hi ni 26, December 2022 a chinfel hman tur a ruahman a ni. Electoral Roll thar hi ni 15, January 2023 a tlangzarh leh tur a ni a. Election Commission of India ruahman angin Draft Electoral Roll hi kum tin January, April, July leh October-ahte ennawn thin a ni ang.

Kolasib district Draft Electoral Roll tlangzarhna ah hian Political Party hrang hrang aiawhte, NGO hruaitute, Electoral Registration Officer leh Assistant Electoral Registartion Officer-te an tel a ni.