2578/2022-2023
Champhai, the 9th November, 2022: Special Summary Revision of Photo Electoral Roll, 2023 neihna tura Draft Electoral Roll, 2023 Champhai District thar ber chu Election Officer Pu H.Lalhruaitluanga'n vawiin chawhma khan DC Conference Hall-ah a tlangzarh. Political party aiawhte hnenah Draft Electoral Roll, 2023 tlangzarh copy khat theuh a hlan nghal a ni.

Election Officer Pu H.Lalhruaitluanga chuan Special Summary Revision of Photo Electoral Roll, 2023 kalpui tura Draft Electoral Roll 2023 tlangzarh a ni ta chu lawmawm a tih thu a sawi a. Electoral Roll dik leh felfai nei tura tanlak tlan a tul thu leh document dik lo hmanga hmalak tumte ven leh dapchhuah kawnga inthurual a tul thu sawiin, tuna fimkhur loh hian nakin zelah nghawng tha lo a siam thei dawn a ni, a ti a. Electoral Roll-a chuang tur dik takte hmaih awm lova dahluh vek tum a nih thu pawh sawiin, khawtlang hruaitu, NGO leh political party aiawhte chu Electoral Roll dik leh felfai siam kawnga thahnemngai taka thawhhopuiah a sawm a ni.

Draft Electoral Roll 2023 tlangzarh takin a tarlan danin Champhai District chhunga Assembly Constituency 3 huamchhunga Polling Station 84 ah vote nei mi 55,301 (mipa 27,036 leh hmeichhia 28,265) an awm a, mipa vote nei aiin hmeichhe vote nei 1,229 in an tam zawk a ni. Assembly Constituency zingah 24-Champhai South A/C ah vote nei mi 20,289 (mipa 9,746 leh hmeichhia 10,543) awmin an tam ber a, 23-Champhai North A/C in dawtin vote nei mi 19,531 (mipa 9,498 leh hmeichhia 10,033) awmin an dawt a, 25-E.Tuipui A/C-ah voter 15,481 (mipa 7,792 leh hmeichhia 7,689) awmin vote nei awm tlemna ber a ni.

Kumin January ni 15 a Final Electoral Roll, 2022 tlangzarh (voter 55,357) nena khaikhinin vawiina tlangzarh Draft Electoral Roll, 2023 (voter 55,301) ah hian vote nei zat 56 (0.1%) in a kiam a. Continuous updation hnuaia form 6 kaltlanga dilna lut 119 pawm a ni a, form 7 kaltlangin awm nawn 1, thi 2 leh insawn 172 te paih niin, paih zat hi avaiin 175 a ni.

Special Summary Revision of Photo Electoral Roll, 2023 ah hian qualifying date chu January ni 1, 2023 a ni a, hemi ni a kum 18 tling hman tur India khua leh tui (citizen) dik takte tan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. Ruahman dan chuan Special Summary Revision of Photo Electoral Roll 2023 kaltlang hian November ni 9, 2022 atanga December ni 8, 2022 chhungin Claims and Objection Period- Electoral Roll-a inthun, paih, insawn leh siam that, dilna thehluh theih hun chhung hawn a ni a, hemi hun chhung vek hian a remchan dan angin hearing neih chhoh zel a ni ang. December ni 26, 2022 atangin dilna leh rawtna thlente chinfel a ni ang a, database siamthat leh supplement chhutchhuahte tihfel a nih hnuah January ni 15, 2023 hian Electoral Roll thar ber tlangzarh tum a ni.

Dilna hrang hrangte hi veng/khaw tina BLO te bakah online in nvsp.in leh Moblile App- Voter Helpline Application (VHA) hmangte a thehluh theih a ni bawk a. Vawiina Draft Electoral Roll, 2023 tlangzarh hi DEO Office, mahni bialtu ERO/AERO/ Booth Level Officer (BLO) hnenah a en theih mai bakah CEO website ceo.mizoram.gov.in ah a en theih bawk a ni.