No.6557/2020-2021

Kolasib 16^th November 2020: Vawiin chawhma khan DC Conference Hall, Kolasibah January ni 1, 2021 a kum 18 tling thar turte tiam a Electoral roll siamthat hna kalpui mek ‘Draft Electoral Roll’ tlangzarhna hun hman a ni a. He Draft roll-ah hian Voter 59,822 awmin hmeichhe voter hi 1,644 in an tam zawk a ni.

Draft Electoral Roll talngzarhtu Dr.H.lalthlangliana, Deputy Commissioner chuan Draft Roll tlangzarh a nih atanga siam that dilna hun hawn chhung ngeiin siamthat ngaite siam a nih theih nan, Political party aiawh a lo kalte, khawtlang hruaitute leh mawhphurna changtu sawrkar hnathawkte chu a chah a. Electoral Roll rintlak buatsaih tur chuan Roll a chuang tur ngei ngeite kim tak a ziah luh leh a chuang lo turte chuan loh tir tur a nih thu Kolasib DC chuan sawiin chumi ni tur chuan Draft Electoral Roll tlangzarh chu uluk tak a zirchiang a, mi tin hmuh tur a phochhuah a tul thu a sawi bawk a ni. 

Pu Vanlalchhuanawma Chawngthu Draft Electoral Roll chungchang sawi zauna hun neiin dilna hrang hrang thehluh theih hun chu December ni 15, 2020 thleng a nih thu a sawi a. Covid-19 hrileng avangin internet hmang tangkai a, online-in www.nsvp.in ah dilna thehluh uar turin kalkhawmte a chah.

Kolasib District Draft Electoral Roll-ah hian e-roll buatsaih hmasak nen voter hi 15 in an tlem a, 4-Tuirial (ST) Assembly Constituency ah voter 80 in an tlem laiin 5-Kolasib (ST) Assembly Constituency ah 49 leh 6-Serlui (ST) Assembly Constituency ah 16 in an pung thung a ni. Draft e-roll a chhinchhiah danin Kolasib district-ah Classified service voter 400 an awm mek bawk a ni.