No.6558/2020-2021

Dated Champhai, the 16th November, 2020: Vawiin khan Champhai DC Pisa-ah Special Summary Revision of Photo E/Roll, 2021 neihna tura Draft Electoral Roll thar ber chu District Election Officer  Maria C.T Zuali chuan tlangzarhin, Party aiawh te hnenah Draft Electoral Roll, 2021 tlangzarh Copy khat theuh  a hlan nghal a ni.

District Election Officer Pi Maria C.T Zuali chuan Summary Revision of Electoral Roll chu kum tina kalpui thin Vote nei tharte Electoral Roll a an luh theihna tur leh siam that ngai leh a dangte buaipuina tura kalpui anih thu a sawi a. Electoral Roll a inziahluh hunah hming ziah fimkhur angaih thu sawiin, zirna leh lehkha pawimawh danga mi nena inmil thlapa ziah thin angai a ni, a ti a. Electoral Roll felfai tak nei thei tura thawhpuiah tlawmngai pawl leh political party aiawhte a sawm a ni. 

Pu Lalnunfela Chawngthu, Election Officer chuan Summary Revision of Electoral Roll kalpui mek chu Champhai district chhunga Assembly Constituency 3 atana buatsaih anih thu sawiin, Khawzawl district a bet tawh khaw thenkhatte 23-Champhai North Assembly Constituency-ah an la awm thu a tarlang bawk. Election Commission of India (ECI) Roll-a la lut lo Village Council (VC) Roll-a inziakluta VC inthlana Vote thlak tawhte pawh ECI Roll-a lut tura dil thar leh vek turin a chah nghal a ni.

Vawiina Draft Electoral Roll 2021 tlangzarhin a tarlan danin  Champhai District chhunga Assembly Constituency 3-ah  Vote nei mi 53,120 (Mipa 25,978 leh Hmeichhia 27,142) an awm a, heng bakah hian service voter 426 an awm bawk. Mipa voter aiin Hmeichhe vote nei 1,164 in an tam zawk a ni. 

Assembly Constituency zingah 23-Champhai North A/C-ah voter 19,054 (Mipa 9,271 leh Hmeichhia 9,783) awmin a tam ber a, 24-Champhai South A/C-in dawtin voter 18,974 (Mipa 9,109 leh Hmeichhia 9,865) awmin, 25-E. Tuipui A/C-ah voter 15,092 (Mipa 7,598 leh Hmeichhia 7,494) awmin vote nei an tlem ber a ni. Champhai District chhunga vote nei zawng zawng  53,546 atang hian General Voter 53,120 (Mipa 25,978 leh Hmeichhia 27,142) leh Service Voter 426 (mipa vek) an awm a ni.  

Special Summary Revision 2021 ah hian qualifying date chu January Ni 1, 2021 a ni a, hemi ni a Kum 18 tling hman tur India khua leh tui (citizen) dik takte chuan Electoral Roll-ah luh an dil thei ang. Hemi rual hian siam that ngai siam, paih ngai paih leh insawn duhte siam fel theihna hun pawh hawn reng a ni ang. Ruahman dan chuan Special Summary Revision of Photo E/Rolls 2021 hnuaiah November Ni 16, 2020 atanga December  Ni 15, 2020 chhungin Claims and Objection hun; Electoral Roll-a inthun, paih, insawn leh siam that,  dilna thehluh theih hun chhung atan hawn a ni ang a. Dilna lutte January  Ni 10, 2021 hmain chinfel vek hman tum a ni a. January  Ni 14, 2021 atangin Database-te siam that leh  supplement-te chhutchhuah vek hman tum a ni a, Electoral Roll siam that leh a thar ber ni tur chu January Ni 20, 2021 ah tlangzarh tum a ni.

Dilna hrang hrangte hi online in nvsp.in ah thehluh theih a ni a, Moblile app Voter Helpline hmang leh Veng/Khua tina BLO te hnenah a thehluh theih a. DC, SDO (Civil) leh BDO Office-ahte a thehluh theih bawk a ni. Vawiina Draft Electoral Roll 2021 tlangzarh tak hi DC/DEO Office, mahni bialtu ERO/AERO/ Booth Level Officer (BLO) hnenah en theih a ni a. CEO website ceo.mizoram.gov.in ah a en theih a ni bawk.