Kolasib dated 21th March 2021: Nimin khan Kolasib District chhunga MLA Assembly Constituency 3 Tuirial, Kolasib leh Serlui bialtu MLAte sum thawhkhawm atanga lei, Morgue Van chu Kolasib Sub Hqrs YMA kutah hlan a ni. Morgue Van hlanna inkhawm hi Kolasib Venglai Taitesena hall-ah neih niin, Kolasib Sub Hqrs YMA Vice President Pu Lalrinmawia Ngente-in a kaihruai a, Khuallian, Food, Civil Supplies and Consumer Affairs Department Minister Pu K.Lalrinliana chuan thu sawiin, Kolasib District Hospital-a chhiat tawk te dinhmun a hriatpui thu leh harsatna an tawh ah YMA ten an hahpui thinzia a hriatpui thu a sawi a, MLA 3 te hmalaknaa Kolasib District chhunga chhiat tawkte harsatna hmachhawn țhin sutkian a ni tur chu lawmawm a tih thu a sawi. Minister chuan YMA ten District chhung ramria sawrkar hmalaknaah an tawiawm thin avangin lawmthu a sawi bawk a ni.

Tuirial Bialtu MLA Pu Andrew H.Thangliana pawhin thu sawiin Morgue Van chu a bial chhunga harsatna tawk te tan malsawmna a nih ngei a beisei thu a sawi a.

Serlui bialtu MLA Pu Lalrinsanga Ralte pawhin YMA leh sawrkar thawhhona chungah lawmthu a sawi. 

Sub Hqrs YMA Secretary Pu Thomas D.Lalenglianan' report pein, Kum 2019-ah Sub Hqrs YMA ten Kolasib DC-ah mithi phurhna tur an mamawh thu leh hmalakpui tur a an lo thlen tawh thu a sawi a, vawiin niah MLA pathum ten cheng Nuai 3 țheuh an thawh hmanga tih hlawhtlin a ni thei ta chu lawmawm a tih thu a sawi bawk a ni.

Sub Hqrs YMA President Pu C.Liankunga pawhin lawmthu sawina hun hmangin Maj Lalmuanchhana'n Morgue Van Pathian hnenah a hlan bawk a ni.

Morque Van (YODHA 4 x 4) leina atan hian cheng Nuai 9,11,561 sen a ni a. Pu K. Lalrinliana Minister, Pu Lalrinsanga Ralte MLA leh Pu Andrew H. Thangliana MLA ten nuai 3 theuh an thawh khawm atanga lei a ni. Power Grid Corporation of India Ltd. Ramrikawn Tuivamit, Aizawl ten cheng nuai 1 an thawh ve bawk a ni.