Aizawl, 21st March, 2021 : Commerce & Industries Minister Dr. R. Lalthangliana chuan nimin khan Bangladesh khawpui Dhaka-a thilsiamna hmunpui thenkhat a tlawh a, heng factory te hian tha takin an lo dawng sawng a ni.

Dr. R. Lalthangliana chuan Dhaka-a thawmhnaw siamna hmun lian tak, ABS Fashion Ltd tlawhin, an factory hnathawh dan te leh thilsiam chhuahte a en a, he factory-ah hian thawktu 3000 chuang an awm a, Europe leh khawvel hmun hrang hrangah an thilsiam hi an thawn chhuak a ni. Hemi hnu hian plastic bungrua chi hrang hrang siamna hmunpui Bengal Polymer Wares Ltd. tlawh lehin plastic hmanga thilsiam chi hrang hrang a en leh a, he factory ah hian mi 2000 chuang thawkin ram hrang hrang 60-ah an thilsiamte an thawn chhuak mek a ni. Heng factory te thilsiam chhuah zingah hian India leh Mizoramah pawha kan lo lei leh hman mek tam tak a tel a ni.

Nimin zing vek khan Minister Dr. R. Lalthangliana leh Bangladesh-a zofa awmten nen inkawmhona hun tha tak an nei bawk a. Minister zinnaah hian Commerce & Industries Department official ten an tawiawm a ni.