No.7859/2020-2021

Aizawl, 20th March, 2021 : Vawiin khan Sports Minister Pu Robert Romawia Royte chuan Lunglei Sazaikawna NCC 2 Mizo Batallion thar office hmun tur a tlawh a. Kum 2019 a Mizoram cabinet in a lo rel tawh angin Lungleia NCC dinna tur atan Defence Ministry pawhin phalna a lo pe tawh a. Hemi tih puitlinna tura hmalak dan tur chungchang hi Sports Minister chuan NCC hotute leh Sports Department  Commissioner & Secretary te nen a hmunah sawi hovin April 2021 chhung hian engkim ti fel a, May ni 1, 2021 atangin NCC 2 Mizo Batallion te chuan office luah lut thei turin an rel a ni. Lunglei 2 Mizo Battalion NCC hian district 5,  Lunglei, Lawngtlai, Siaha, Hnahthial leh Serchhip district te an enkawl dawn a ni.
 
Pu Roberta hian Lunglei Music Centre din a nih tur thu a lo puan tawh angin tukin zing vek khan a hmun tura rawt chu a en nghal a. Lunglei leh Zoram chhimlama music leh zaia tuimite tana chhenfakawm tak Music Centre din tura ruahmanna siam a ni tih sawiin Jam room tha tak tak te nen,  Recording Studio te pawh din turin sawrkarin hma a la mek tih a sawi a.
    Sports Minister hian Lunglei  naupang Infiammi rual ten Thuamluaia Muala football an practice lai a hmunah a tlawh  bawk a ni.