Rs. 80.47 lacs senga sak District Information & Public Relations Office building, Kolasib chu vawiin khan Pu Lal Thanzara, Minister I&PR etc. in a hawng.

Hawnna inkhawmah Pu Lal Thanzara chuan District Information & Public Relations Office (DIPRO) building changtlung tak hawn a ni thei ta chu lawmawm a tih thu sawiin, Kut tling taka a sa tu ten an chhuah hi lawmawm a ni a ti. DIPRO Office leh Conference Hall te mipuiten tangkai taka an hman a duhsak thu a sawi a. Kolasib district a hmasawnna hmuh tur tam tak awm chho zel chu Bialtu MLA, DC, SP, District a official te leh khawtlang hruaitute thawhhona leh hmalakna tha anih thu a sawi a. I&PR hi mipui hnena sorkar hmalakna te hrilhhre tu an ni a, hemi kawnga MJA te nen thawhhona tha tak an nei chu lawmawm a tih thu sawiin, Sorkar Department hrang hrang ten I&PR tangkai zawka hmang turin a chah bawk. Minister chuan hmasawnna hi eng anga nasa poh ni se ram mipui te kan hrisel loh chuan awmzia a neilo a, hriselna lamah kan harh thar a, zuk leh hmuam, zu leh ruihtheih thilah te, ei leh in a fimkhur a taksa tana thalo bansan nachang hriat a ngai a ni a ti a. NLUP chungchang sawiin Minister chuan NLUP hnuaiah chhungkaw nuai khat chuang tanpuina pek anih tawh thu a tarlang a, chhungkaw tam tak dinhmun chawikan anih ngei a beisei thu a sawi. A dawngtuten an hlawhtlinpui ngei theih nan sorkar hnathawk te pui leh a tul anga thurawn pe turin MJA te leh khawtlanghruaitute a chah a. District a Department hotute pawh hmasawnna atana sum lo lut te a nihna anga hmang zel turin a chah bawk.

Pu Jim K Chozah, Director, I&PR pawn thusawiin DIPRO office building neih a nih theih nan a officer awm te leh Department dang sorkar hnathawkte thawhrimna leh thawhhona chu fakawm a tih thu a sawi a.

Pu H.Lalengmawia, District Bawrhsap pawhin thusawiin District Information & Public Relations Office building hawn theia a awm Kolasib District tan hmasawnna rahbi pawimawh tak a nih thu sawiin, Office hmunhma tha tak neih a nih theih nana hmalatu te fakawm a tih thu a sawi.

Building hawnna inkhawm hi Pu David L Thangliana, Jt.Director, I&PR in a kaihruai a ni.

District Information & Public Relations Office building hawn tak hi RCC building chhawng khat niin, ground floor-ah office a awm a, first floor-ah Conference Hall a awm a ni. DIPRO, Kolasib ah hian District Information & Public Relations Officer pakhat, leh staff nghet 4 an awm mek a ni.