Nimin chawhma khan Circuit House Conference Hall, Kolasibah District Integrated Child Protection Services Joint Committee, Kolasib district member-ten Minister Pu K Lalrinliana, bialtu MLA kawmna hun an nei a, an hnathawh dan tlangpui te sawiin Kolasib district chhung a Observation Home leh Office sakna tur hmun an mamawh thu te an thlen bawk a ni.

Integrated Child Protection Services Joint Committee -te tarlan danin Kolasib district ah hian in ruak luah hawh a Observation Home hi kalpui mek a nih thu leh a hmunhmain a zawh tawk loh avang hian Home changtlung zawk sakna tur hmun an mamawh thu Minister hnen ah hian an thlen a ni. Pi Laltlanmawii, DCPO chuan Observation Home chu naupang kum 18 la tlinglo, dan kalh a khawsa thin te nunkawng dik inzirtirna hmun pawimawh tak a nih thu te, eizawn nana tangkai tur Vocational training pek an nih thu te leh an hriselna te endik sak thin an nih thu a tarlang a. Kum 2019 January leh February 2020 inkar khan naupang 14 home-ah hian enkawl an nih thu a sawi bawk a ni.