Vawiin chawhma khan Governor P.S. Sreedharan Pillai  chuan Khawzawl a tlawh a. Governor  pual hian official programme Krishi Vigyan Kendra(KVK) Khawzawl hmunah buatsaih a ni a. Official programme zawhah Kohhran Hruaitute, Village Council hruaitute, Political Party aiawhte, Khawtlang Hruaitute leh District Official te nen inkawmna hun an hmang a ni.

Governor puala Official programme, KVK Meeting Hall a buatsaih hi Pu H.Lianzela, Khawzawl Bawrhsap chuan a kaihruai a. He hunah hian Governor P.S. Sreedharan Pillai chuan Khawzawl mipuite nen Vantlang inkhawm neih a chak thu leh hrileng avanga neih theih a ni ta lo erawh pawi a tih thu a sawi a ni. District 11, March thla chhunga tlawh chhuah erawh a la tum thu te, district tam zawk chu a tlawh chhuah tawh thu te pawh a sawi a. Governor chuan District hmasawnna te, thingtlang khaw lama hmasawnna te chu ram hmasawnna atana pawimawh a nih avangin Sawrkarin state capital a ngaih pawimawh ang thovin thingtlang mite hmasawnna a ngai pawimawh a ni a ti.

Governor chuan Mizoramah sawrkar hmalakna hnuaiah hmasawnna a awm mek zel tih a sawi a. Mizo mipuiten tan an laka sawrkar hmalakna an thlawp that phawt chuan India rama state hmasawn ber kan ni thei a. "Ziak leh chhiar thiam tamnaah pawh Kerela khumin pakhatna nih kan tum tur a ni. Tin, faina kawngah entawn tlak kan niin ka hria; district hospital tam tak ka tlawh tawh atangin hei hi ka chiang a. Mizorama Hospital te hi India ramah Hospital fai ber an niin ka hria", a ti.

Governor chuan state in Financial Resources nei tlem deuh mahse haichhuah tur tam tak kan nei tih a sawi a. "India hmarchhak a cheng mipuite hi India ram pumpuia mipui zawng zawng belhkhawm zinga 3% chauh an ni a. Mahse, India in hmarchhak state te hman tur 10% lai Budget-ah a dah a. Hengte hi tangkai taka haichhuah leh hmasawnna atana hman kan tum a ngai a ni" a ti.

Governor hian Kohhran Hruaitute, Village Council hruaitute, Political Party aiawhte, Khawtlang Hruaitute, Tlawmngai Pawlte leh District Official te a mal te tein a kawm leh a. He hun hi Addl. DC Pu Paul L. Khuma'n a kaihruaia. Governor hi Pu K. Lalthawmmawia, Secretary to Governor, Khawzawl Bawrhsap Pu H.Lianzela leh Pu P.C. Lalchunglura, SP, Khawzawl District ten an tawiawm a. He hunah hian Department hrang hrang aiawhin Bawrhsap Pu H.Lianzela hnen atangin Presentation thlirho a ni a. Dan leh Thuphek chungchanga hmalakna bikah presentation Pu P.C. Lalchunglura, SP hnen atangin thlirho a ni leh a ni.