Kolasib District chhunga Sorkar Department hrang hrang a hnathawkte inkara thawhhona tha a awm theih nana buatsaih ni li chhung awh, Kolasib District Inter - Office Sports Meet 2016 15th November, 2016 a tan chu vawiin khan Hmar Veng Hall,Kolasib-ah Bialtu MLA Pu PC Zoram Sangliana'n a khar a, Hmar Veng Hall tuaithar a hawng nghal a ni.

Khuallian chuan Department hrang hranga hnathawk te inpawhtlanna tura infiamna hun huaihawt a ni chu lawmawm a tih thu sawiin, hlawkthlak hle a a hriat thu a sawi. Sorkar hmalakna hrang hrang te a hlawhtlinna bulpui ber chu a hnathawkte inpekna a ni tiin, thawhhona tha tak nena hnathawk zel turin a chah a. Kolasib District in Mizorama awmchhun ni tura air crush wooden floor Badminton Court an nei chu a vanneihthlak thu sawiin, player tha tak tak chherchhuahna hmun a nih ngei a beisei thu leh dimdawi tak tangkai tak si a hman anih ngei a beisei thu a sawi.

Khuallian hian Hmar Veng Hall, Kolasib, Badmintion Court pahnih awmna chu a hawng nghal bawk a. He court hi air crush wooden floor niin, a siam nan hian MLA Fund Rs.16.20 lacs leh Kolasib Badminton Association sum Rs.3.30lacs hman a ni.