No.1275/2021-2022

Kolasib Dated 7th July 2021 : Vawiin chawhma dar 11 khan Chief Medical Office, Kolasib hmalaknain Kolasib District Jail-a awm mekte tan COVID-19 Vaccine pek a ni. Mizoram chhunga COVID-19 hrileng darh zelah a huhoa inenkawlna hmun hrang hrang endik hna kalpui thin a ni a, District Jail, Kolasib pawh hi hri vei awm leh awm loh hi ni 2, July 2021 khan endik niin vei tumah an awm lo a ni. Heng hmun a awmte hian dan pangngaia Vaccine la thei turin sawrkar Document pawimawh nei tawh lo an awm thin a, chumi harsatna chu hriain, COWIN site-ah Registration fel tak nen Vaccine pek theih dan ruahman sak an ni a, Vaccination Certificate pawh an siam sak thei dawn bawk a ni. 

Vawiin a Vaccination kalpuinaah hian Vaccination Team-te chuan District Jail hi a hmunah an pan chilh a. District Jail-a thawktute'n lo tawiawmin, Vaccination Protocol tha tak zawm chung a kalpui a ni. Tun dinhmunah Kolasib District Jail-ah hian Jail tang mi 79 awmin, mi 77 te hnenah Vaccine 1st Dose pek an ni a, midang pahnih Vaccine pek lohte hi Vaccine la tawh an ni. Pu Thuthlungropuia, Superintendent of Jail chuan COVID-19 hrileng laka mitin kan him theih nana sawrkar hmalakna chu lawmawm a tih thu a sawi. 

Nimin vek khan CMO hmalaknain Saihapui, Buhchang leh Bukvanneiah te Vaccination Team hian Vaccination an lo kalpui tawh a. Ni 3.6.2021 Inrinni khan Bukpuiah mi 196, Vairengteah mi 43 leh Bairabiah mi 415 pek an ni a. Kolasib Main Centre Diakkawn Hall-ah mi 1,280 te hnenah Vaccine pek ni bawkin, hei hi Kolasib District-a Vaccination Site khata Vaccine pek tam ber tum a ni.