Vawiin khan Kolasib DC Pu Jitender Yadav, IAS hovin a Office Chamber-ah Kolasib leh Hailakandi District-te inkara District mipui leh state ramri depa cheng mipuite inunauna leh inlaichinna boruak tha zawk a awm theih nan Outreach Programme neih dan tur chungchangah meeting neih a ni.
Pu Jitender Yadav chuan Cachar District nena Outreach Programme April ni 8 leh 9 a Dholai, Cachar District a neih chu a hlawhtling hle nia a hriat thusawiin Outreach Programme Hailakandi District nena neih turah hian Hailakandi District depa awm Kolasib District-a khaw hrang hrang mite pawh a tam thei ang ber tel thei ve se tiin a rawt a. Ramri depa awm khua te inkara boruak tha leh muanawm a awm chuan state pahnih te inkara inunauna leh thawhhona chu chak thei zawk nia a hriat thu a sawi bawk.
Kolasib leh Hailakandi District-te inkara Outreach Programme chungchangah ah hian tun thla ni 11 khan Kolasib Addl. DC Pu Lalfela Sailo leh a thawhpuite leh Hailakandi District thuneitute chu Hailakandi ah an in be tawh a, vawiina meeting ah hian meeting hmasa a rawtna leh ruahmanna an sawi dun te chu an report a. Outreach Programme duang fel tur hian Kolasib leh Hailakandi District aiawhte chuan May 7 ah Bairabi-ah meeting an nei leh dawn a. Vawiin meeting chuan Outreach Programme hi May 20 leh 21 a neih an rel a. Outreach Programme hi Hailakandi District chuan Garmura ah an thleng dawn a ni.
Kolasib leh Cachar District-te inkara hnam zairang pholanna leh infiamna chu hmanrua ah hmangin hlawhtling takin Outreach Programme chu April ni 8 leh 9 khan Dholai, Cachar District, Assam ah neih a lo ni tawh a, District pahnih DC ve ve te hian he programme hi hmanpuiin District 2 te mipui leh thalai thahnem tak an tel a ni.
Vawiina meeting ah hian Kolasib DC Office-a officer engemaw zat bakah MCO Kolasib , Kolasib District Football Association, District Sports Committee leh Tug of War, Kolasib aiawhte an tel a ni.
