398/2022-2023
Kolasib dated 4th May 2022: Vawiin chawhma khan DC Conference Hall, Kolasibah District Level Fire Prevention Committee-te chuan thutkhawmna neiin Kum 2022 chhunga kangmei ven kawnga hmalakna kalpui dan hrang hrangte thlir ho a ni a. Kangmei chhuak tum 312 awm tawhin chung zinga 300 chu lo hal vang a nih thu leh ram kang tum 12 a awm thu tarlan a ni.

Pu John LT Sanga, Deputy Commissioner leh Chairman, District Level Fire Prevention Committee chuan ram leilung hausakna humhalh chu mi tin mawhphurna a nih thu leh tun a hmalakna chuan kan hma hun thui tak a hril dawn avangin tihtakzet a ngaituahna sen a tul thu a sawi a. Kawlphetha siam chhuah nana lui kan khuahna kam ti chereu zawnga hmalakna hmuh tur a awm leh thin chu pawi a tih thu sawiin dan anga hmalakna kalpui a nih tur thu leh ram leilung hausakna venhim pawimawh zia inzirtirna uar zawk a kalpui a tul thu a sawi bawk a ni.

Pi Margaret Lalramchhani, IFS, DFO, Kolasib chuan kum 2022 chhunga kangmei ven kawnga hmalakna kalpui dan te sawiin Forest Survey of India tarlan dan a tum 312 kangmei chhuak atanga Hectare 464.99 chu lo hal vang a nih thu leh Hectare 4.73 chu ram tih kan vang a nih thu a sawi a. Serlui tuikhuah kam a kangmei chhuak a mawhphurtu dapchhuah a nih theih nan Kolasib Police Station ah thubuai thehluh a nih tawh thu a sawi.

Vawiin thutkhawmah hian hmuhphiah chingtuten a hun tak a ram an hal hman loh thin avanga harsatna an tawh dan sawi ho a ni a, lo nei a eizawng chhungkaw 1726-ten tin 3170 a zau lo neihna tur a hal a nih thu leh hunbi tuk chhung a lo hal hman lo, a hranpa a dilna theh lut mi 40 an awm thu tarlan a ni bawk. Serlui leh Tuirial Hydel Project tuikhuah kam ram ngaw chereu mek siamthat leh humhalh a nih theih nana hmalak dan tur sawi ho niin dan lo a huan leh lo siam lui an awm a nih chuan hremna pek an nih tur thu sawi a ni bawk.